Tobhiti 13 - Shona Common Language Catholic Bible（SCLBD）

XII: ZIONI

1Tobhiti akadetemba achiti,

“Ngaarumbidzwe Mwari anogara narini wose,

nokuti umambo hwake hunogara nokusingaperi!

2Nokuti iye anoranga,

uye anoregerera

anodzikisa vanhu kunzvimbo yavachakabvu,

achizovaburitsazve munhamo chaiyo yokuparadzwa,

hapana angambopunyuka mumaoko make.

3Itai kuti mbiri yake idhumhe kumarudzi ose,

imi vaIsiraeri;

nokuti kunyange zvazvo

akakumwararisai mukati mavo

4imomo ndimo maanokuratidzai ukuru hwake.

Mukudzei vapenyu vose vachizviona.

Ndiye Tenzi wedu!

Ndiye Mwari wedu!

Ndiye Baba vedu!

Ndivo Mwari narini narini wose.

5“Kunyange zvazvo akakurangirai uipi hwenyu

anozokunzwirai tsitsi mose.

Achakukokorodzai kupi nokupi kumarudzi,

kwose kwose zvako kwamakamwarariswa.

6Imi mukadzokera kwaari

nomwoyo wenyu wose nomweya wenyu wose

mukava zvino pachokwadi naye;

iye ndopaachadzokera kwamuri

asisakufuratirei.

Onai mabatiro akanaka aakakuitai

mutendei nezwi guru.

Rumbidzai Tenzi woruenzaniso,

pembererai Mambo, Chidzachepo!

Ini pachezvangu

ndichaimba ndichimurumbidza

munyika youtapwa yandiri

ndinoita kuti simba

noukuru hwake zvizikanwe

kurudzi rwakapara zvitadzo.

Imi vatadzi dzokerai kwaari;

magariro enyu ave akarurama anomufadza.

Zvichida angakuitirei nyasha

akakunzwirai tsitsi.

7Ini pachangu ndinopemberera Mwari,

mweya wanguwo unofarira Mambo Wedenga.

8Ukuru hwenyu ngaugare huri pamuromo wavanhu vose

mbiri yake iite zvokuimbwa muJerusaremu.

9“Jerusaremu iwe, Guta Rinoera,

twawakabata namaoko ako,

twakakunzwisai kurohwa naMwari;

asi vana vevakarurama anongovaitira tsitsi.

10Tendai Tenzi sezvazvinofanira kuti zviitwe,

murumbidze Mambo, Chidzachepo,

kuti Temberi yako ivakirwe mauri norufaro

uye mauri iwe awane mokunyaradzira

upi noupi zvake akambotapwa

uyewo kuti akwanise kuda vose

vanotambudzika vari mauri iwe

pazvizvarwa zvose zvichauya.

11“Chiedza chinopenya kwazvo,

chichavhenekera matunhu ose pasi pano,

marudzi akawanda achakotonoka kubva kure

achibva mativi ose kwakaperera nyika,

kuzogara pedyo nezita rinoera raTenzi Mwari,

vakabata mumaoko zvipo zvaMambo Wedenga.

Mauri iwe, chizvarwa nechizvarwa

ndimo machichaitira rufaro rwacho.

Zita reguta irori Nyakusarudzwa

richaramba riripo

zvizvarwa nezvizvarwa zvichauya.

12“Anokunyomba ngawirwe norushambwa,

anokuparadza apindwewo norushambwa,

neanopaza tsvingo dzako,

naakoromorera pasi nharire dzako,

naanopisa dzimba dzako!

Ngavakomborerwe narini wose

vanokuvaka!

13Ndopauchazopembera uchifarira

vana vavanhu vakarurama

nokuti vose vachange vakurumukiramo

vachirumbidza Tenzi, Chidzachepo.

14“Zvavo chokwadi vanokuda,

zvavo vanofarira rugare rwako

zvavo chokwadi vakakuchema

chirango chenyu chose

nokuti vachafara iyezvinouno vari mauri

vachitozvionerawo rufaro rwako rwose

mazuva achauya.

15Ini ndinokurumbidzai

Tenzi, Mambo mukuru

16nokuti Jerusaremu richavakwa patsva,

muguta Temberi yake ichavamo

narini narini wose.

“Chikomborero chakadii,

kuwana weropa rimwechete neni,

achasara zvake kuti azoona mbiri yako

nokurumbidza Mambo Wedenga.

Misuo mikuru yeJerusaremu ichavakwa

yakashongedzwa namabwe esafaya neemeradhi,

tsvingo idzi dzose zvadzo

dziri dzamatombo anokosha,

nhare dzeJerusaremu dzichavakwa nendarama,

pamusoro porusvingo pachashongedzwa

nendarama chaiyo yakanakisisa.

17Migwagwa yeJerusaremu ichanyatsonzi ware ware

namatombo erubhi namatombo okuOfiri.

18Misuo mikuru yeJerusaremu

ichawunga nenziyo dzorufaro

dzimba dzake dzose dzichiti,

‘Areruya!’

Ngaarumbidzwe Mwari weIsiraeri!

Mauri ndimo mavacharumbidza zita rinoera

narini narini wose!”