Ungwaru 2 - Shona Common Language Catholic Bible（SCLBD）

1Chinovadariso ndechokuti

vanokanganisa mukufunga vachizviti,

“Upenyu hwedu hupfupi uye nderwenhamo.

Kana mugumo womunhu wasvika hapana chinomurapa.

Hazvisati zvambonzwika kuti munhu anodzoka kuvafi

2vanenge vachiti zvakangoitikawo kuti tiberekwe.

Mangwana tichaita sokunge tisina kumbovapo

nokuti mweya uri mumhino dzedu unongova utsi.

Kunyange pfungwa idzi kapfarivari kanobarika

panopfura mwoyo.

3Kana kadzimwa

muviri unodzokera kuva dota,

mweya unongonyangarika semhepo isina chinhu.

4Nokufamba kwenguva

zita redu rinokanganikwa.

Hapana anozoyeuka zvatakaita

upenyu hwedu huchanyangarika

sokunyangarika kwekakorewo zvako,

huchipararira semhute

inodzingwa nemiseve yezuva

ichikundwa nokudziya kwaro.

5Nguva yatakapiwa yakangoita sokupfuura kwemumvuri

kana wafa zvokudzoka, hapana

nokuti kwakanamwa kwazvo,

hapana zvokudzoka.

6Saka huyai tifare

tinakirwe zvedu nezvinhu zviripo

tinonyatsoshandisa zvakakwana zvisikwa

sezvinoita vechidiki.

7Uyai tidutire waini inokosha

tizore mafuta anonhuwirira.

Pasave neruva renguva

yepfumvudza rinotipfuura.

8Ngatizvigadzei ndaza yemaruva amarozi

asati auna.

9Hapana anofanira kushaika pakusasana kwedu.

Ngatisiyei kose kose

zvinoratidza kufarikana kwedu nokuti uyu

ndiwo mugove wedu iyoyu

ndiyo nhakawo yedu iyoyi.

10Ngationesei nhamo murombo akarurama

tirege kuitira tsitsi chirikadzi

kana kuremekedza harahwa dzachena musoro.

11Mukundo watinawo ndiwo ngauve murao,

chinenge chisina simba

chatoratidza kuti hachina basa.

12Ngatihwandirei munhu akarurama,

nokuti anotitadzisa kuita madiro,

nokuti anopesana nezvatinoita,

anotipa mhosva yokudarika mutemo,

achitipawo mhosva

yokupandukira zvatakadzidziswa.

13Anoti iye anoziva Mwari,

achizviti mwana waMwari.

14Ndiye ava mutsoropodzi wepfungwa dzedu.

15Iko kumuona chete kwavakutiremera

nokuti magariro ake akasiyana neevamwe,

uye maitiro ake mamwewo zvawo.

16Anotiona setisiri vanhu,

anosema nzira dzedu sedzakan'ora.

Anoti kuguma kwomunhu akarurama rufaro,

achizvikudza achiti, ‘Mwari ndibaba vake.’

17Ngationei kana kutaura kwake kuri chokwadi,

tione pakupera kwoupenyu hwake

kunowira tsvimbo nedohwe.

18Kana wakarurama ari mwana waMwari,

achamubatsira, achimununura

mumaoko avavengi vake.

19Ngatimuedzei nokumunyomba nokumurwadzisa

tione kupfava kwake ikoko

timuedze kuzvibata kwake mukutambudzwa.

20Ngatimutii afe rufu runonyadzisa,

nokuti iye anoti anodzivirirwa.”

Kukanganisa kwavasiri vanamati

21Aya ndiwo mafungiro avaiita,

uku kwaiva kurasika gwara,

nokuti nouipi hwavo hwakavapofomadza.

22Havazivi mazano akavandika aMwari;

kunyange chitarisiro chomubairo woururami

nezvinopiwa vanoitira Mwari,

kana kufungawo kuti pane mubairo inowanikwa

nemweya yakarurama.

23Mwari akasika munhu kuti asazofa,

akamusika akamufananidza naiye pachake.

24Asi pamusana peshanje yaSatani

rufu rwakapinda munyika,

uye vanomutevera vanozvionera

rufu pamhuno sefodya.