Jeremiya 31 - Shona Common Language Catholic Bible（SCLBD）

Kudzokera kumusha, kwavanhu vakanga vatapwa

1“Panguva iyoyo, zvanzi naTenzi ini ndinenge ndiri Mwari wedzimhuri dzose dzeIsiraeri naivowo vachava vanhu vangu.”

2Zvanzi naTenzi,

“Vanhu vakapunyuka bakatwa vaya

vakawana nyasha kurenje,

paitsvaga Isiraeri runyararo.

3Ini Tenzi ndakazvionesa kwauri ndiri nechokure.

Ndakakuda norudo rusina mugumo

ndokusaka ini ndakaramba ndakangotendeka kwauri.

4“Ndichakuvaka, ugovakika,

iwe mhandara, Isiraeri.

Uchazvishongedza zvakare netambureni

uendewo uchindodzana pamutambo

navanenge vachifara.

5“Uyewo uchasima minda yamagirepisi

mumakomo eSamaria.

Vasimi vachasima

vagofarira kudya nomuchero wacho

6nokuti kuchava nezuva rokuti

vachengetedzi vachayambira

vari munyika yokwaEfuremu yamakomo

vachiti, ‘Simukai tikwire kuguta reZioni

kuna Tenzi, Mwari wedu.’ ”

7Chikonzero ndechokuti, zvanzi naTenzi,

“Imbai muchiita zvokutodaidzira

muchifarira vokwaJakobho

mushevedzere kwazvo muchiitira

changamire wendudzi nendudzi dzavanhu,

muparidze murumbidze muchiti,

‘Tenzi akanunura vanhu vake

chitsama chavakasara veIsiraeri.’

8“Chinzwai ndichavauyisa

ndichivabvisa kunyika yokuchamhembe

ndichivakokorodza kure kure

kwakaperera nyika chaiko

pakati pavo paina mapofu nevakaremara

nomudzimai akazvitakura pamwechete

nomukadzi anenge achirwadzwa pakusununguka.

Vachadzoka kuno vari

gurusvusvu guru chairo.

9“Vachauya vachihwihwidza kuchema,

ndichivanyaradza nokuvatungamirira pakudzoka.

Ndichavafambisa nomuhova dzemvura,

munzira yakati twasu

mavasingazofa vakadzedzereka

nokuti ini ndiri baba kuIsiraeri

uye vokwaEfuremu ndivo dangwe rangu.

10“Inzwai shoko raTenzi,

imi ndudzi nendudzi dzavanhu,

muriparidze kure

kunyika dzomumahombekombe megungwa.

Itii, ‘Nyakumwararisa Isiraeri uya,

achaikokorodzazve achizoichengeta

sokuchengetedza kunoita mufudzi

danga rezvipfuwo zvake.’

11“Chikonzero chacho ndechokuti

Tenzi akaponesa vokwaJakobho

achivanunura mumaoko

meane simba kukunda iye.

12Vachauya vagoimba vachiita zvokudaidzira

pamutunhu wakatunhumara weZioni

vachifarira mwoyo wakanaka waTenzi,

vachifarira mbeswa newaini

namafuta eorivhi, vachifarirawo

vana vezvipfuwo zvavo nemhuru.

Upenyu hwavo huchaita

sebindu rinodiridzwa,

havachazofazve vakazvidya mwoyo.

13“Ipapo ndopachapembera kufara, vasikana vodzana zvino,

majaya navakura vachifara zvavo.

Nhamo yavo yokuchema

ndichaishandura kuva kupembera kufara.

Ndichavanyaradza ndichivapa mufaro

panzvimbo pokusuruvara.

14Ndichaita kuti vapristi

vanakirwe mumwoyo nezvakawanda

vanhu vangu vachigutswa

nezvakanaka zvangu

ndozvinoreva Tenzi.”

Tenzi anoitira vanhu vake tsiye nyoro

15Zvanzi naTenzi,

“Izwi rinonzwika kuRama,

kuungudza nokuhwihwidza kuchema

Rakeri achiridzira mhere vana vake

vachiramba kunyaradzwa nezvevana vake

pamusana pokuti havasisipo.”

16Zvanzi naTenzi,

“Izwi rako ngarichirega

kana kuburitsa misodzi

mumaziso mako

nokuti uchapiwa mubayiro

webasa rako,

ndizvo zviri kutaura Tenzi,

uye vachadzoka vachibva

kunyika yomuvengi.

17Chitarisiro chichiripo

choupenyu hwako hweramangwana

ndizvo zviri kutaura Tenzi

uye vana vako vachadzoka

kunyika yavo.

18“Ndanzwa vokwaEfuremu vachichema nhamo

Inga makandipingudza,

ndakapinguka sejongosi

risina kupingudzwa.

Ndidzoserei kwakare

ndiite sezvandakanga ndiri

nokuti imi ndimi

Tenzi, Mwari wangu.

19Ndinodaro nokuti

mushure mokunge ndarasika

ndakapinduka,

uyewo mushure mokunge ndadzidziswa

ndakaombera maoko

ndakabatwa nenyadzi ndikadumbirwa nazvo

nokuti ndaitenge ndakafumuka

nezvandakaita kubvira pauduku hwangu.

20“VokwaEfuremu ava mwanakomana wangu

wapamwoyo here chaizvo?

Ndiye here mwana wangu wandinodisa?

Chinondipa kudaro ndechokuti

pose pandinotaura zvokumuyambira

ndinenge ndichingomufunga chete.

Ndokusaka mwoyo wangu uchimusuwa,

ndichatomuitira tsitsi chete,

ndizvo zviri kutaura Tenzi.

21Zviisirei mucherechedzo mugwara

muzvigadzirire zvikwangwani zvokuzotevedza,

nyatsofungai mugwagwa mukuru,

nzira yamakaenda nayo.

Chidzoka nhai mhandara Isiraeri

udzokere kumaguta ako iwaya.

22“Kusvikira rini chaizvo

uchingowaya-waya kudai,

nhaiwe mwanasikana asina kutendeka?

Chavapo ndechokuti

Tenzi asika chinhu chitsva panyika

chokuti munhukadzi ndiye

ava kupfimba munhurume.”

Chitenderano chitsva chichaita kuti zvinakire vanhu vaMwari

23Zvanzi naTenzi wehondo nehondo, Mwari weIsiraeri, “Vachamutsiridzazve munyika yokwaJudha nomumaguta ayo pandinenge ndavadzosera makomborero avo, kutaura, chikomborero ichi chokuti:

“Tenzi ngaakukomborere

iwe musha wokururama

iyewe chikomo chinoera!

24Izvozvo nyika yokwaJudha namaguta ayo ose vachagarisana pamwechete navarimi vaya vanopota-pota zvavo namatanga avo ezvipfuwo

25nokuti ini ndichagutsa mweya wakaneta ndichisimbaradza mweya wose wakarukutika.

26“Ndakapepuka ndikaona kuti ihope dzangu dzanga dzichindinakira.

27“Chinzwai, zvanzi naTenzi mazuva ari kuuya andichasima imba yokwaIsiraeri nemba yokwaJudha vanhu nemhuka.

28Zvimwe zvichazoitika ndezvokuti sokuona kwandakaita vachidzipurwa nokupazwa vachikurirwa vachiparadzwa nhamo dzichivawira saizvozvo ndichatoonawo kuti vavakwa nokusimwa, ndizvo zviri kutaura Tenzi.

29Mumazuva iwayo vanhu vacharega kutaura muromo wokuti:

“Madzibaba akadya magirepisi anovava,

nezvo vana vaita ugugu mumazino.

30“Asi kutoti munhu wose anofanira kufira chitadzo chake, nyakudya magirepisi anovava ndiye ane mazino achaita ugugu.

31“Chionai, zvanzi naTenzi mazuva achasvika andichaita chitenderano chitsva nemba yokwaIsiraeri nemba yokwaJudha.

32Chichange chisina kufanana nechitenderano chiya chandakaita namadzitateguru avo pandakavabata ruoko ndichivaburitsa munyika yeIjipiti, chitenderano changu chavakaputsa kunyange zvazvo ini ndiri ini ndaiva murume wavo, ndizvo zviri kutaura Tenzi.

33Asi ichi ndochitenderano chandichaita nemba yeIsiraeri mushure memazuva iwayo, ndizvo zvinotaura Tenzi, chokuti:

“Ndichauisa mutemo wangu mavari

ndichiunyora pamwoyo pavo.

Ini ndichava Mwari wavo,

ivo vachivawo vanhu vangu.

34Kuchange kusisina zvokudzidzisanazve

mumwe nomumwe, hama nehama,

munhu achiti, ‘Zivawo Tenzi,’

nokuti vose zvavo vachandiziva

kubvira kumuduku-duku

kusvikira kumukuru wacho

ndizvo zviri kutaura Tenzi

nokuti ndichavaregerera uipi hwavo

uye chitadzo chavo

handichazombochirangarirazve.”

Rudzi rwavanhu vaTenzi harurovi

35Zvanzi naTenzi,

iye anopa kuti

zuva rivhenekere masikati

nokurongera mwedzi zvokugara uchiita

nenyenyedzi kuvhenekera usiku,

iye anobvongodza gungwa

zvokuti mafungu atinhire,

zita rake ndiYahweh

wehondo nehondo.

36Kana urongwa ihwohu

hukabva pamberi pangu,

ndizvo zviri kutaura Tenzi

ndopachozorega zvizvarwa zveIsiraeri

kuva rudzi pamberi pangu narini wose.

37Zvanzi naTenzi,

“Kana matenga mudenga'mu

achigona kuerwa,

uye ugaro hwenyika muvhu umu

huchigona kuongororwa,

iniwo ndopandingarase

zvizvarwa zvose zveIsiraeri

ndichivarasira twose twavakabata,

ndizvo zviri kutaura Tenzi.”

Kuvakwa kunoshamisa kweJerusaremu

38Chinzwai zvanzi naTenzi, “Mazuva achasvika achavakirwa Tenzi guta iri kubvira paNharire yokwaHananero kusvikira kuSuo Guru repakona.

39Uye tambo yokueresa ichapfuudzwa ipapo yoti tande yakananga kuchikomo cheGarebhu yozotsaukira kuGoa.

40Bani rose zvaro rezvitunha namadota uye namakura ose kusvikira kuKakova keKidhironi kudzamara kukona yeSuo Guru raMabhiza tonanga kumabvazuva richava rinoera raTenzi. Harisi kuzofa rakadzipurwa kana kukurirwazve kusvikira narini wose.”