Esita g 12 - Shona Common Language Catholic Bible（SCLBD）

Tsamba yamambo Ahasuerusi yokutsinhira chirevoTsamba yacho ndiyoyi iyi:“Ndini mutekwatekwa mambo Ahasuerusindinokunyorerai imimadzishe enyika zana namakumimaviri ane nomwe,kubvira kuIndia kusvikira kuItiopianokumasadunhu ari pasi pawo ndichiti,

2“Sezvandava mutongi

wendudzi zhinji dzavanhu kudai,

changamire wapasi pano pose,

ndisingade zvangu kuzvitutumadza

namasimba asi kuti

ndichigara ndichiita zvinhu

nomazvo uye mwoyo wetsitsi.

Chandafunga ini ndechokuti

vanhu vangu vave noupenyu

hwakagarikana vari murunyararo

runogara nokugara,

kuitira kuti nyika yangu ive norugare,

vanhu vanyatsofamba zvavo

nzendo kubvira kwainobvira

kudzamara kwainoperera kuti

kuchivazve norugare

runodiwa nomunhu wose.

3“Pandakabvunza makurukota angu kuti

tingazviite sei izvozvo ipapo

Hamani imwe nyanzwi yapamusoro chaizvo

pakati pedu inopinda isu

mukuona nyaya, munhu kwaye

chaiye ane mbiri, asingasanduke–sanduke,

kusina mupindu akazviwanirawo

chinzvimbo chechipiri kuna mambo,

4akatiisira pachena kuti

mukati mendudzi dzose

dzavanhu panyika

mune rumwe rudzi

rwavanhu rune mwoyo wokupanduka

rwatekesheramo, vane mitemo inopikisana

nemitemo yedzimwe ndudzi

dzavanhu uye vanogara zvokushaya

hanya nezvirevo zvamadzimambo,

ndomugariro wavo.

Nezvo zvokuti ini

ndibatanidze nyika

dzoumambo huno izvi

zvandanga ndichidawo kuti ndinyatsoita

hazvisi kuzomboitika.

5Tiri kunzwa kuti vanhu ivava

voga voga kudaro

vanogara vakapikisana

navamwe vanhu vose

vachitevera zvisina maturo ose

namaitiro mamwewo nemirawo isina ani akamboona;

chavo chete kupandukira hurumende yangu

vachiita zvose zvakaipa zvavanokwanisa

kuitira kuti nyika yangu

itadze kunyatsogarika.

6Naizvozvo ndatema kuti vamakadomerwa

mutsamba dzaHamani ari kutungamirira

zvinhu izvi, uye ndibaba wedu wechipiri.

Vose zvavo ivavo vanofanira

kuparadzwa pamwechete navakadzi vavo

navana vavo zvokutsvaira chaizvo zviya.

Ngavaparadzwe namapakatwa avavengi

vavo pasina zvokuitira tsitsi

kana kunzwira urombo pamusi wegumi nechina

wemwedzi wegumi newechipiri,

mwedzi waAdhari wegore iro rino iri.

7Izvi zvinenge zvichiitirwa

kuti ivo vacho vanga vagara

vaine mwoyo wokupanduka

ivavo navachina mwoyo wakadaro,

nezuva rimwechete chairo

vanzi noutsinye chaihwo munyikadzimu

ririri, hurumende yedu isare

yanyatsogarika isisina chinoitambudza

mune ramangwana.”Munamato waModhekai

8Modhekai akayeuka mabasa ose aTenzi akanamata kuna Tenzi achiti,

9“Nhai Tenzi, Tenzi!

Mambo mutongi wezvinhu zvose,

pamusana pokuti denga nenyika

zviri pasi pesimba renyu

uye hakuna angagone kupikisana nemi

kana imi mada kununura Isiraeri

10nokuti ndimi makasika denga

nenyika nekanhu kose zvako kanoshamisa

kapasi pedenga pano.

11Ndimi Tenzi wazvose,

hakuna mumwe angamirisane

nemi imimi Tenzi.

12Munoziva zvinhu zvose wani,

imi Tenzi munozvizivawo kuti wangu ini hauzi

musikanzwa kana kuzvikudza kunyange

zvako kukarira kuti ndiwane

mbiri kwakandiitisa izvozvo

zvokuti ndirambe kupfugamira munhu

anozvitutumadza uya Hamani.

13Ndinodaro nokuti handaitadza

kutsvoda pasi petsoka dzake

chaipo kuitira kuti Isiraeri iponeswe.

14Asi chandakaitira izvi kwaiva

kuti ndirege kupa munhu mbiri

inopfuura mbiri yaMwari.

Zvino handisi kuzombopfugamira

munhu kusiya imimi chete iyemi

Tenzi wangu uye chandiri kuitira

izvozvi izvi hakusiri kuzvikudza.

15“Saka zvino imi Tenzi Mwari, Mambo,

Mwari waAbhurahamu ponesai vanhu venyu

nokuti mhandu dzenyu dzakatotirarisa

namaziso matsvuku kuti vatitsakatise.

Vari kuda kurozva nhaka

yaiva yenyu kubvira pakutanga.

16Regai kushayira hanya mugove

wenyu wamakazvinunurira

pachenyu kunyika yeIjipiti.

17Inzwaiwo munato wangu

munzwirewo tsitsi nhaka yenyu.

Sandurai kusuruvara kwedu kuve kufara

kuti tiraramire kurumbidza

zita renyu imi Tenzi.

Musaparadze miromo yavanokurumbidzai.”

18MuIsiraeri yose rakave jemedzanwa nokuti rufu rwakanga rwatarisana navo.