Ungwaru 6 - Shona Common Language Catholic Bible（SCLBD）

II: UNGWARU CHII? HUNOBVEPI? HUNOITEI? HUNOTSVAGWA SEI?Madzimambo, tsvagai ungwaru

1Madzimambo, chiteererai munzwisise!

Dzidzai, imi vatongi venyika

dziri kwakaperera nyika.

2Teererai munzwe

imi munotonga zviuru zvakazanirana,

imi vacho munozvikudza

pamusana pouwandu hwenyika dzamunotonga.

3Chikonzero chacho ndechokuti

simba ramuinaro makaripiwa naTenzi

ukuru hwenyu hunobva kuna Wokumusorosoro,

ndiyewo anoongorora mabasa enyu

nokupenengura mazano enyu.

4Nokuti imi vatariri voumambo hwake,

hamuna kutonga zvakafanira,

kana kuchengeta murau,

nyangwe kuita zvinoda Mwari.

5Achauya nokukurumidza zvinotyisa kwazvo,

nokuti zvinotemerwa vakuru vakuru zvakaomarara.

6Vapasipasi vachanzwirwa tsitsi vagoregererwa,

asi vana masimba vacharangwa zvakaomarara,

7nokuti Tenzi wazvose zvose haana waanotya

haambotya kana munhu mukuru mukuru zvakadii

nokuti ndiye akasika voruzhinji

navakuru vakuru,

vose anovabata zvakangoenzana.

8Asi vanamasimba oukuru

vachabvunzisiswa zvinorwadza.

9Ndosaka ndichikutaurirai izvi,

imi madzimambo,

kuti mudzidze ungwaru murege kutsaudzira,

10nokuti vanochengeta murau zvitsvene

vachanziwo vatsvene,

uye vakazvidzidza

vachava nechokuzvidzivira nacho.

11Naizvozvo isai mwoyo yenyu pane zvandinotaura,

ngwarirai mazwi angu,

muzvitsvire mwoyo, mudzidze ungwaru.

Ungwaru hunokwanisa kuwanikwa

12Ungwaru hunopenya,

haumbofa hwakabhuruvara,

huri nyore kuonekwa navanouda,

huri nyore kuwanikwa navanoutsvaga.

13Ndihwo hunototanga kuuya kuna vanousuwira.

14Anomukira kuutsvaga haanetseki,

nokuti anotouona huri pamisuo mikuru yake.

15Kuurangarira, uchenjeri huzere.

Anohushayira hope,

anokurumidza kuwana rusununguko mumwoyo.

16Ungwaru hunotenderera nenyika

huchitsvaga vakaukodzera,

hunosangana navo munzira dzavo

hwoti hekani waro;

hunenge huinavo mupfungwa iri yose.

17Mavambo oungwaru kudisisa kudzidza,

kudisisa kuudzidza ndiko kuuda.

18Kuuda ndiko kuchengeta mitemo yahwo,

kuchengeta mitemo yahwo

kune chokwadi chokusafa,

19kusafa kunoisa munhu pana Mwari.

20Naizvozvo kudisisa ungwaru

kunosvitsa kuumambo.

21Naizvozvo, kana imi, vatongi vavanhu,

muchida zvigaro zvoumambo,

uye, tsvimbo dzoumambo,

remekedzai ungwaru

kuti mutonge nokusingaperi.

Soromoni ava kutsanangura ungwaru

22Zvino ndava kukuudzai kuti ungwaru chii,

uye kuti hwakavapo sei;

handichakuvanzirai zvakavandika.

Ndichatevedza nhoroondo yahwo

kubvira kumavambo ezvisikwa

ndichiuita kuti hunyatsozivikanwa zvauri,

ndisingasiye chokwadi.

23Handimbofamba munzira yeshanje

inoodza mwoyo,

nokuti haina ukama noungwaru.

24Kuwanda kwavangwaru ruponeso rwapasi pose,

kuva namambo anonzwisisa kugarika kwavanhu vake.

25Naizvozvo dzidzai mumazwi angu, muwane chimuko.