Sira 3 - Shona Common Language Catholic Bible（SCLBD）

Kuremekedza vabereki

1Vana, teererai zvandinotaura ini baba venyu,

muite saizvozvo kuti muchengeteke,

2nokuti Mwari ndiye anogadza baba

ukuru hwavanaho pavana vavo,

anosimbisawo chiremera chaamai

kuvanakomana vavo.

3Anoremekedza baba vake,

anopfupira zvitadzo,

4uye, anoremekedza amai vake

akafanana naanozviunganidzira upfumi.

5Anoremekedza baba vake achapiwa

makomborero avana vanomufadza,

achanzwika nezuva raanochema kuna Mwari.

6Anoremekedza baba vake

achararama kwamakore mazhinji;

uye anoteerera Mwari

anogadzanisa mwoyo waamai vake,

7anoshandira vabereki vake

savana tenzi vake.

8Kudza baba vako namazwi nezviito,

uzowana chikomborero chinobva kwavari.

9Nokuti chikomborero chababa

chinotsigisa dzimba dzavana vavo,

asi kana amai vakati ngadziwirwe norushambwa

dzimba dzavo dzinoparara.

10Rega kuzvirumbidza

nokunyadzisa baba vako,

nokuti kunyara kwavo

hakukupi mukurumbira.

11Mbiri yomunhu inobva

mukuremekedza baba vake;

vana kana vasingaremekedzi amai vavo

vanova vana vakafumuka.

12Mwanangu, chengeta baba vako

kana vachembera,

rega kuvatsamwisa vachiri vapenyu kudai.

13Kana dai vapererwa nepfungwa,

zivawo kuti kuita kwavakura,

usavaite munhu pasina,

iwe uchiri kuzvinzwa.

14Nokuti mutsa wakaitirwa baba haukanganwikwi,

uchaverengerwa pane zvinopfupira zvitadzo;

15pazuva raunenge wava munhamo,

uchayeukwa pamusana pawo,

woregererwa zvitadzo

sokunyungurutsa chando kunoita zuva.

16Kuramwa baba kushonha Mwari.

Kutsamwisa amai kuzviunzira rushambwa naMwari.

Mwoyo wokuzvirereka

17Mwanangu, fambisa mabasa ako

nomwoyo wokuzvirereka,

ugozodiwa navanhu vanofadza Mwari.

18Sokukura kwakaita ukuru hwako,

ibva watonyanyawo kuzvidukupisa

ugova munhu anofarirwa naMwari

20nokuti masimba aMwari makuru,

asi anoremekedzwa navanozvidukupisa.

21Rega kuvavarira kunzwisisa zvakakuomera

uye rega kutsvagurudza zvoruzivo

runopfuura njere dzako.

22Rangarira pawakapiwa napo

usave nei nezvakavandika.

23Rega kuzvitambudza nezvisinei nebasa rako,

nokuti zvawakadzidziswa iwe

zvinotopfuura runzwisiso rwomunhu.

24Vazhinji vanorasiswa nezvavanofunga,

kufunga kwavo kwakaita

kuti varasike pakufunga kwavo.

Mwoyo

26Munhu akaoma musoro nenharo,

mugumo wake inhamo.

Anoda pfumvu anofa nayo.

27Munhu ane musoro wakaoma nenharo

achatakurana nadzo nhamo;

mutadzi anovirikidza zvitadzo

pane zvimwe zvitadzo.

28Maronda omunhu anozvikudza haarapiki,

nokuti dungirwa rouipi rakadzika midzi maari.

29Ane njere anorangarira mumwoyo dimikira.

Mungwaru anodisisa kuwana anomupa nzeve.

Mwoyo wakanaka kuvarombo

30Mvura inodzima marimi omoto,

saizvozvowo kupa vasina chavanacho

kunopfupira zvitadzo.

31Uyo anodzosera zvakanaka

nezvakanaka anozotonderwa,

munhu anofunga nezvamangwana

kana oda kuputsika

anowana anomugamha.