Ungwaru 5 - Shona Common Language Catholic Bible（SCLBD）

1Ipapo akarurama achamira asingavhunduki

pamberi paavo vakanga vachimuonesa nhamo,

vaimutsvinyira mukutambudzika kwake.

2Pavanomuona vachadedera zvikuru nokutya,

vachinyanya kushamiswa nokuponeswa

kwake kwavakanga vasingatarisiri.

3Vachazvidemba vachishungurudzika,

vachigomera vachitaurirana vachiti,

4“Inga ndiye uya wataiita chiseko,

tichimusveeredza kwazvo.

Tichimuita setsumo yokumushora.

Inga taiva zvituta!

Taiti upenyu hwake upenzi,

tichiti mafiro ake anonyadzisa.

5Seiko ava kuverengerwa

mukati mavana vaMwari?

Seiko mugove wake wava mukati mavakarurama?

6Heya! Isu ndisu takatsauka mugwara rechokwadi!

Mwenje woururami hauna kutivhenekera

uye zuva harina kutibudira.

7Nzira dzakawanda dzisina mutemo nedzoumharadzi

ndidzo dzatakafamba

tikapfuurawo nomugwenga musina nenzira yose,

asi nzira yaMwari ndiyo yatisina kuziva.

8Kuzvikudza kwataiita kwakatibatsireiko?

Ko, kuzvitutumadza nokupfuma kwedu kwakatipei?

9Izvo zvose zvakapfuura somumvuri

uye sorunyerekupe runopfuura zvarwo.

10Zvakaita sengarava

inofamba mumasaisai emvura,

kana yapfuura haina muhwezvwa unoonekwa,

kana gwara rainosiya mumasaisai.

11Zvakaitawo seshiri inobhururuka mumhepo,

hapana chinoonekwa kuti yapfuura napapa.

Mhepowo zvayo inorohwa

nokubhabhama kwamapapiro ayo,

ichipeurwa nesimba rokubhururuka kwayo.

Mushure macho hapana panozoonekwa

kuti apa ndipo payaenda napo.

12Uyezve, kana museve ukapfurwa

wakananga pauri kunanga

mhepo yapaunopfuura napo inoganhurwa

yobva yadzokerana pakare pakare

zvokuti hapana anozoziva pawapfuura napo.

13Ndozvinesuwo, takati tichangobarwa

tikabva taguma,

hapana chakarurama chatakaratidzawo.

Asi takapera basa nouipi hwedu ihwohwo.”

14Chitarisiro chavasiri vanamati chakaita

sehundi inopepereswa nemhepo,

kana sehuruva inopupurutswa nedutu remhepo;

chinopararira seutsi hunovhuvhutwa nemhepo

chinorova somueni anogara kwezuva rimwechete.

15Asi vakarurama vanorarama nokusingaperi,

mubairo wavo uri kuna Tenzi;

iye Wokumusorosoro anovachengeta.

16Saizvozvo Mwari noruoko rwake achavadzika

zviremba zvinovapa mukurumbira, nokuvasunga

tsungare dzinovapa runako,

nokuti ndiye achavadzivirira norudyi rwake,

oita ruoko rwake kuti ive nhoo yavo.

17Shungu dzake Tenzi ndidzo dzaachaita demautare

rokuzvidzivirira naro muhondo,

zvisikwa achazviita zvombo zvokurwisa

vavengi nazvo.

18Achapfeka ruenzaniso sehembe

yesimbi yedemautare

Kutonga kusina rusaruro kuri iko nguwani,

19nhoo yake ichava ururami husingakundwi.

20Acharodza hasha dzake kuva bakatwa racho

zvisikwa zvose zvichava rimwe naye

kuita hondo namapenzi avanhu iwaya.

21Mheni icharova payakananga seyabva

muuta hwamakore hwakatatamurwa.

22Kuchakandwa chivhuramahwe chine hasha

sechinokandwa nerekeni.

Masaisai enyanza achamukira vavengi vake;

hasha dzenzizi dzichavanyudza

zvisina tsitsi.

23Mhepo inesimba guru ichavhuvhuta,

ichivapeperetsa sedutu.

Saka kushaya murawo kuchaparadzisa pasi pose,

uipi huchapazisa zvigaro zvamadzimambo.