1Pesalome ya ga Dafita e e kwaletsweng moopedisi.
2 Morena,
go tla nna goleele go le kae?
A o tla ntebalela ruri?
O tla mphitlhela sefatlhego sa gago
sebaka se se kana kang?
3Ke tla akanya goleele go le kae
mo moweng wa me,
ke tlhola ke tletse bohutsana
mo pelong?
Mmaba wa me o tla inkgodisetsa
sebaka se se kana kang?
4A o ko o bone, o nkutlwe,
Morena, Modimo wa me!
Sedifatsa matlho a me
gore ke se robale thobalo ya loso,
5le gore mmaba wa me a se re:
“Ke mo fentse,”
mme baganetsi ba me ba se ipele,
fa ke theekela.
6Mme nna,
ke ikanya boitshwarelo jwa gago;
pelo ya me
e tla ipelela thuso ya gago.
Ke tla opelela Morena pako,
ka a ntiretse molemo.
Who We AreWhat We EelieveWhat We Do
2025 by iamachristian.org,Inc All rights reserved.
