NUMERI 12 - Setswana 1970（TSW70）

Miriame wa mongongoregi o bediwa ka lepero

1Letsatsi le lengwe Miriame le Arone ba ne ba nyefola Moše ka ntlha ya mosadi wa Mokhuše yo a neng a mo tsere; gonne o ne a nyetse mosadi wa Mokhuše.

2Ba ne ba re: “A Morena o buile ka Moše a le esi fela? A ga a a bua le ka rona?” athe Morena o a ba utlwa.

3Monna yoo, Moše, o ne a le pelonolo thata bogolo go batho botlhe ba ba mo lefatsheng.

4Mme Morena a akofa a bua le Moše le Arone le Miriame a re: “Tswelang kwa Tenteng ya Boipontsho ka boraro jwa lona. Ba tswa ka boraro jwa bone.”

5Ke fa Morena a fologa a le mo pinagareng ya leru, a ema fa mojakong wa Tente, a bitsa Arone le Miriame, mme ba tswa boo bedi.

6Morena a re: “Utlwang tlhe mafoko a me! Fa mongwe mo go lona e le moporofeti wa Morena, ke tla mo ikitsise ka pono, ke bua nae ka toro.

7Mme ka ga Moše motlhanka wa me, ga go a nna jalo, ke yo o ikanyegang mo ntlong yotlhe ya me.

8Ke bua nae re lebagantse difatlhego le ka pono, e seng ka dinyepo; o bona ponalo ya Morena. Ke go reng, fa lo sa boifa go nyefola Moše motlhanka wa me?”

9Jaanong Morena a ba tukela bogale, a tsamaya.

10Mme ya re leru le sena go tloga mo godimo ga Tente, Miriame a bo a sweufetse ka lepero jaaka semathana. Ya re Arone a retologela kwa go Miriame, a mmona a le lepero.

11Ke fa Arone a raya Moše a re: “Tswetswe, mongwame, a ko o se ka wa re rwesa boleo, ka re dirile ka bosilo, ra leofa.

12A Miriame a se nne jaaka moswi yo bontlhanngwe jwa nama ya gagwe bo jegileng, fa a tswa mo sebopelong sa ga mmaagwe.”

13Moše a goela Moreneng a re: “Joo! Modimo, a ko o mo fodise!”

14Ke fa Morena a raya Moše a re: “Fa rraagwe a ka bo a mo kgwetse mathe mo sefatlhegong, a o ka bo a se ka a tlhajwa ke ditlhong malatsi a supa? A a tswalelwe malatsi a supa kwa ntle ga bothibelelo, a be a tsholwe gape morago ga moo.”

15Miriame a tswalelwa jalo malatsi a supa kwa ntle ga bothibelelo. Mme morafe wa se ka wa bolola ga tsamaya Miriame a ba a tsholwa.

16Morago ga moo morafe wa tloga kwa Haserothe, wa thibelela mo sekakeng sa Pharane.