GENESI 47 - Setswana 1970（TSW70）

Jakobe o dumedisa Farao

1Josefa a ya kwa go Farao, a mo itsise a re: “Rre le bomorwa-rre ba gorogile ba na le matsomane a bone le metlhape ya bone le tsotlhe tse e leng tsa bone, ba tswa kwa lefatsheng la Kanana, ba gorogetse mo nageng ya Gosene.”

2O ne a tsere ba le batlhano mo go bomorwa-rraagwe, a ba isa fa pele ga Farao.

3Jaanong Farao a ba botsa a re: “Tiro ya lona ke eng?” Ba araba Farao ba re: “Rona batlhanka ba gago re badisa ba matsomane jaaka borraetsho.”

4Ba be ba raya Farao ba re: “Re tsile go jaka mo lefatsheng leno; gonne ga go na mafulo a matsomane a batlhanka ba gago, mme tlala e kgolo mo lefatsheng la Kanana. Jaanong ka thapelo, a batlhanka ba gago ba nne mo nageng ya Gosene.”

5Ke fa Farao a raya Josefa a re: “Rraago le bomorwa-rraago ba tsile kwa go wena.

6Lefatshe la Egepeto le go atlanegetse. Rraago le bomorwa-rraago o ba bee mo nageng e e gaisang. A ba nne mo nageng ya Gosene. Mme fa go na le ba ba tlhaga mo go bone, o ba dire baokamedi ba badisa ba ga etsho.”

7Jaanong Josefa a tsaya rraagwe, a ya go mo supa fa pele ga Farao. Ke fa Jakobe a tshegofatsa Farao.

8Farao a botsa Jakobe a re: “Malatsi a bophelo jwa gago a kae?”

9Jakobe a araba Farao a re: “Malatsi a leeto la bophelo jwa me ke dinyaga di le 130. Mme malatsi a bophelo jwa me a ne a le mannye fela, le gona a le botlhoko. Ga a lekane le malatsi a bophelo jwa borre a ba neng ba phela ka ona.”

10Jakobe a sadisa Farao sentle ka tshegofatso, a ba a mo tlogela.

11Josefa a baya rraagwe le bomorwa-rraagwe mo lefatsheng la Egepeto mo nageng e e gaisang e e bidiwang Ramasese ka fa Farao a laetseng ka teng, a ba naya boswa jwa naga teng.

12Josefa a babalela rraagwe le bomorwa-rraagwe le malapa otlhe a bone ka dijo, mongwe le mongwe ka fa palong ya ba ba mo lapeng.

Leuba le a tswelela pele

13Mme ga bo go se na dijo mo lefatsheng lotlhe, gonne tlala e ne e le kgolo thata, mo naga ya Egepeto le ya Kanana di bileng tsa felelwa ka ntlha ya yona tlala.

14Josefa a kgobokanya madi aotlhe a selefera a a leng mo lefatsheng la Egepeto le mo Kanana ka mabele a ba a rekang; a isa madi kwa ntlong ya ga Farao.

15Jaanong e rile madi a sena go fela mo lefatsheng la Egepeto le mo Kanana, Baegepeto botlhe ba tla kwa go Josefa ba re: “Re fe dijo! Kana re na le go swelang fa pele ga gago? Gonne madi a fedile.”

16Josefa a re: “Rekang ka diruiwa tsa lona, fa go se na madi; ke tla lo naya mabele ka tsona.”

17Ke fa ba ntsha diruiwa tsa bone, ba di neela Josefa. Mme Josefa a rekisa dijo mo go bona ka dipitse le diruiwa tsa matsomane le metlhape le diesele; a ba tlamela ka dijo, ba di reka ka diruiwa tsotlhe tsa bone, ka ona ngwaga oo.

18Ya re ngwaga oo o sena go feta, ba tla kwa go ene ka ngwaga o o latelang, ba mo raya ba re: “Ga re kitla re lobela morena wa rona go re, ka madi a fedile le diruiwa tsa diphedi e le tsa morena wa rona, ga goa sala sepe se re ka rekang dijo ka sona mo moreneng wa rona, fa e se mebele ya rona le masimo a rona.

19Kana re tla bo re swelang fa pele ga gago, rona le masimo a rona? Re reke le masimo a rona ka dijo gore re nne batlhanka ba ga Farao, rona le masimo a rona. Fela re fe peo gore re phele, mme re se ka ra swa, le masimo a se ka a fetoga naga.”

20Josefa a rekela Farao naga yotlhe ya Egepeto, gonne Moegepeto mongwe le mongwe o ne a rekisa tshimo ya gagwe, ka tlala e ne e ba imela mo go botlhoko. Mme lefatshe ya nna la ga Farao.

21Fa e le batho a ba hudusetsa kwa metseng mo lefatsheng lotlhe la Egepeto.

22Fela masimo a baperesiti a se ka a a reka. Gonne baperesiti ba ne ba amogela tuelo e e tlhomameng mo go Farao, ba ja tuelo ya bone e e tlhomameng e Farao a e ba nayang. Ke ka moo ba se kang ba rekisa masimo a bone.

23Ke fa Josefa a raya morafe a re: “Bonang, ke lo reketse Farao kajeno le masimo a lona. Bonang, peo ya lona ke e! Jaanong yaang go jwala kwa masimo.

24Mme e re lo roba, lo neele Farao karolo ya botlhano. Dikarolo tse nne e tla nna tsa lona, e le peo ya masimo le dijo tsa malapa a lona.”

25Ba araba ba re: “O re boloketse bophelo. Fa re ka bona bopelotlhomogi fela mo matlhong a morena wa rona, re tla nna batlhanka ba ga Farao.”

26Go ntshetsa Farao karolo ya botlhano Josefa a go dira molao o o laolang masimo a Baegepeto go fitlha letsatsing leno. Ke masimo a baperesiti fela a e seng a ga Farao.

Kopo ya bofelo ya ga Jakobe

27Baiseraele ba nna mo lefatsheng la Egepeto mo nageng ya Gosene, ba e ja boswa, ba ata, ba ntsifala thata.

28Jakobe ene a phela dinyaga di le 17 mo lefatsheng la Egepeto. Malatsi a ga Jakobe a bophelo jwa gagwe ke dinyaga di le 147.

29Jaanong e rile malatsi a go swa ga Iseraele a atamela, a bitsa Josefa morwawe, a mo raya a re: “A e re fa ke bonye bopelotlhomogi mo matlhong a gago, o bee seatla sa gago fa tlase ga letheka la me, o ntirele ka lorato le boammaaruri: Ke a go rapela, se mphitlhe mono Egepeto!

30A e re fa ke sena go robala le borre, o ntlose mo Egepeto, o ye go mphitlha mo mabitleng a bone.” Josefa a araba a re: “Ke tla dira ka fa mafokong a gago.”

31Rraagwe a re: “A ko o ikane!” A ikana, mme Iseraele a inama mo mosamong wa bolao.