Jakobho 5 - Shona Bible Union Version 2002（SUB）

Vapfumi vasina ngoni vanotukwa

1Nhai, imi vapfumi, chemai muridze mhere nokuda kwamatambudziko achakuwirai.

2Pfuma yenyu yakaora, nguo dzenyu dzapera nezviundudzi.

3Ndarama yenyu nesirivha yenyu zvine ngura; ngura yazvo ichakupupurirai zvakaipa, ichapedza nyama yenyu somoto. Makazvichengetera pfuma pamazuva okupedzisira.

4Tarirai, mubairo wavaranda venyu vakacheka minda yenyu, wamakaramba nawo nokunyengera, unodanidzira; nokudana kwavacheki kwakasvika kunzeve dzaIshe wehondo.

5Makagara zvinonaka panyika muchikarira zvinofadza; makakodza mwoyo yenyu nezuva rokubaya.

6Makatongera wakarurama, mukamuuraya; haakudzivisiyi.

Tsungirirai kusvikira Ishe achiuya

7Naizvozvo hama dzangu, tsungirirai kusvikira pakuuya kwaIshe. Tarirai, murimi anomirira chibereko chenyika chinokosha, achitsungirira pamusoro pazvo kusvikira zvapiwa mvura yokutanga neyokuguma.

8Nemiwo tsungirirai; simbisai mwoyo yenyu, nokuti kuuya kwaIshe kwava pedyo.

9Hama dzangu, musanyunyutirana kuti murege kutongwa; tarirai, mutongi amire pamusuwo.

10Hama dzangu mukutambudzika nokutsungirira teverai makwara avaporofita vakataura nezita raIshe.

11Tarirai, vakatsunga mwoyo tinoti vakaropafadzwa; makanzwa zvokutsungirira kwaJobho, akaona Ishe zvaakavavarira naye, kuti Ishe ano mwoyo munyoro kwazvo, ane tsitsi.

Musapika

12Asi, hama dzangu, kupfuura zvinhu zvose, musapika, kunyangwe nedenga, kana nenyika, kana nokupika kumwe kwose; asi hongu yenyu ngaive hongu, kwete yenyu ngaive kwete; kuti murege kutongwa.

Kunyengetera kune simba

13Kuno mumwe anotambudzika pakati penyu here? Ngaanyengetere. Kuno mumwe anofara here? Ngaaimbe nziyo.

14Kuno mumwe anorwara pakati penyu here? Ngaadane vakuru vechechi; ngavamunyengeterere, vamuzodze namafuta nezita raIshe.

15Kunyengetera kwokutenda kuchaponesa anorwara, Ishe achamumutsa; kana akaita zvivi achazviregererwa.

16Naizvozvo reururanai zvivi zvenyu, munyengetererane kuti muporeswe. Kukumbira kwomunhu akarurama kune simba guru pakubata kwako.

17Eriya akanga ari munhu akaita sesu, akanyengetera nomunyengetero kuti mvura irege kunaya; ikasanaya panyika makore matatu nemwedzi mitanhatu.

18Akanyengeterazve; denga rikanaisa mvura, nyika ikabereka zvibereko zvayo.

19Hama dzangu, kana kuno munhu pakati penyu akatsauka pazvokwadi, mumwe akamudzora,

20ngaazive kuti anodzora mutadzi panzira yokutsauka kwake, uchaponesa mweya parufu nokufukidza zvivi zvizhinji.