Mapisarema 110 - Shona Bible Union Version 2002（SUB）

Umambo noupristi hwaMesiyaPisarema raDhavhidhi.

1Jehovha akati kuna She wangu,

“Gara kurudyi rwangu,

Kusvikira ndaita vavengi vako

chitsiko chetsoka dzako.”

2Jehovha achatambanudza tsvimbo

yesimba rako ribude paZioni, achiti,

“Bata ushe pakati pavavengi vako.”

3Vanhu vako vachazviisa nomwoyo wose

pazuva rauchaunganidza hondo yako,

Nenguva tsvene, pachizvaro chamangwanani,

Ndipo pane dova rohujaya hwako.

4Jehovha akapika, haangazvidembi, achiti,

“Iwe uri mupristi nokusingaperi.

Unorudzi naMerikizedheki.”

5Ishe parudyi rwako

Achaparadza madzimambo pazuva

rokutsamwa kwake.

6Iye achatonga pakati pavahedheni,

Achazadza nyika nezvitunha;

Achaparadza misoro panyika zhinji.

7Achanwa parukova panzira;

Saka achasimudza musoro wake.