Mapisarema 148 - Shona Bible Union Version 2002（SUB）

Zvose zvakasikwa ngazvirumbidze Jehovha

1Hareruya!

Rumbidzai Jehovha, imi muri kudenga;

Murumbidzei panzvimbo dzokumusoro.

2Murumbidzei imi vatumwa vake vose;

Murumbidzei imi hondo dzake dzose.

3Murumbidzei imi zuva nomwedzi;

Murumbidzei imi nyenyedzi dzose dzinovhenekera.

4Murumbidzei imi kudenga kwokudenga–denga,

Newe mvura zhinji, iri kumusoro

kwokudenga–denga.

5Ngazvirumbidze zita raJehovha;

Nokuti iye akaraira, zvikasikwa.

6Akazvisimbisawo nokusingaperi–peri;

Akatema chirevo chisingafaniri kudarikwa.

7Rumbidzai Jehovha imi vapasi,

Imi zvikara zvegungwa, nezviri makadzika;

8Moto nechimvuramabwe, chando noutsi;

Dutu guru, rinoita zvaakareva;

9Makomo nezvikomo zvose;

Miti inobereka nemisidhari yose;

10Mhuka, nezvipfuwo zvose;

Zvinokambaira neshiri dzinobhururuka;

11Madzimambo apasi nendudzi dzose dzavanhu;

Machinda navatongi vose vapasi;

12Majaya nemhandara;

Vatana navana;

13Ngavarumbidze zita raJehovha;

Nokuti zita rake roga rakakurumbira;

Umambo hwake huri kumusoro kwapasi nokudenga.

14Akasimudza runyanga rwavanhu vake,

Kuti arumbidzwe navatsvene vake vose;

Naivo vana VaIsiraeri, ivo vanhu

vari pedyo naye.

Hareruya!