2 Madzimambo 16 - Shona Bible Union Version 2002（SUB）

Ahazi mambo waJudha

1Negore regumi namanomwe raPeka mwanakomana waRemaria, Ahazi mwanakomana waJotamu mambo waJudha wakatanga kubata ushe.

2Ahazi akatanga kubata ushe ava namakore makumi maviri; akabata ushe paJerusaremu makore ane gumi namatanhatu. Asi haana kuita zvakarurama pamberi paJehovha Mwari wake, sababa vake Dhavhidhi.

3Nokuti wakafamba nenzira yamadzibaba aIsiraeri, akapinzawo mwanakomana wake mumoto netsika dzezvinonyangadza zvavahedheni, vakanga vadzingwa naJehovha pamberi pavana VaIsiraeri.

4Akabayira nokupisa zvinonhuwira napasi pemiti yose mitema.

5Ipapo Rezini mambo weSiria, naPeka mwanakomana waRemaria, mambo weIsiraeri, vakasvika Jerusaremu kuzorwa naye; vakakomba Ahazi, asi vakanga vasingagoni kumukunda.

6Nenguva iyo Rezini mambo weSiria akadzoserazve Siria Erati, akadzinga vaJudha paErati; vakaenda Erati, vakagarapo kusvikira nhasi.

7Zvino Ahazi akatuma nhume kuna Tigiratipireseri mambo weAsiria, akati, “Ndiri muranda wenyu nomwanakomana wenyu; uyai mundirwire muruoko rwamambo weSiria, nomuruoko rwamambo weIsiraeri, vanondimukira.”

8Ipapo Ahazi akatora sirivha nendarama zvakawanikwa mumba maJehovha, napapfuma yeimba yamambo, akazvituma kuna mambo weAsiria, chive chipo.

9Mambo weAsiria akamunzwa, mambo weAsiria akandorwa neDhamasikosi, akarikunda, akatapa vanhu, akavaisa Kiri, akauraya Rezini.

10Zvino mambo Ahazi akaenda Dhamasikosi kundosangana naTigiratipireseri mambo weAsiria, akaona atari yakanga iri paDhamasikosi; mambo Ahazi akatuma mufananidzo weatari kuna Uriya mupristi, nomuvakirwo wayo, nomuitirwe wayo wose.

11Mupristi Uriya akavaka atari yakafanana nezvose zvakanga zvatumwa namambo Ahazi achiri Dhamasikosi, mupristi Uriya akaiita saizvozvo mambo Ahazi achigere kudzoka Dhamasikosi.

12Zvino mambo wakati adzoka Dhamasikosi, mambo akaona atari, mambo akaswedera paatari, kuzobayira pamusoro payo.

13Akapisira pamusoro peatari chipiriso chake chinopiswa, nechipiriso chake choupfu, akadururapo chipiriso chake chinodururwa, akasasirapo ropa rezvipiriso zvake zvokuyananisa.

14Uye atari yendarira, yaiva pamberi paJehovha, wakaibvisa pamukova weimba, pakati peatari yake neimba yaJehovha, akaiisa kurutivi rwokumusoro rweatari yake.

15Zvino mambo Ahazi akaraira mupristi Uriya, akati, “Chipisira chipiriso choupfu chamangwanani paatari huru, nechipiriso chamadekwana, nechipiriso chamambo chinopiswa, nechipiriso chake choupfu, nechipiriso chavanhu vose venyika, nechipiriso chavo choupfu, nezvipiriso zvavo zvinodururwa; uye usasire pamusoro payo, neropa rose rechipiriso chinopiswa, neropa rose rezvibairo; asi atari yendarira ndiyo yandichabvunza Mwari nayo.”

16Naizvozvo mupristi Uriya akaita zvose zvaakanga arairwa namambo Ahazi.

17Mambo Ahazi akagura ukomba hwezvingoro, akabvisa mudziyo wokushamba pamusoro pazvo, akabvisawo dziva pamusoro penzombe dzendarira dzakanga dziri pasi paro, akariisa pachigadziko chamabwe.

18Nenzira, yaiva nedenga, yakaitirwa imba yezororo, yavakanga vavaka temberi, nomukova wamambo nechokunze, wakazvishandura mukati metemberi yaJehovha, nokuda kwamambo weAsiria.

19Zvino mamwe mabasa aAhazi aakaita, hazvina kunyorwa here mubhuku yamakoronike amadzibaba aJudha?

20Ahazi akavata namadzibaba ake, akavigwa muguta raDhavhidhi, Hezekiya mwanakomana wake akamutevera paushe.