Mapisarema 45 - Shona Bible Union Version 2002（SUB）

Rwiyo pamutambo waMambo MukuruKumutungamiriri wokuimba; nomuimbirwo weShoshanimi; Pisarema ravanakomana vaKora. Rwiyo rweMashiri. Rwiyo rworudo.

1Mwoyo wangu unotutuma

namashoko akanaka;

Ndinotaura zvinhu zvandakaita

zvinoreva mambo;

Rurimi rwangu ipeni yomunyori

anokurumidza kunyora.

2Imi makanaka–naka kupfuura vana vavanhu;

Nyasha yakadururirwa pamiromo yenyu;

Saka Mwari wakakuropafadzai nokusingaperi.

3Sungai munondo wenyu pachiuno

chenyu, imi wamasimba,

Ukuru hwenyu noumambo hwenyu.

4Fambai noumambo hwenyu muchikunda,

Nokuda kwezvokwadi nounyoro nokururama;

Ruoko rwenyu rworudyi

ngarukudzidzisei zvinotyisa.

5Miseve yenyu inopinza;

Vanhu vanokundwa nemi;

Inobaya pamwoyo yavavengi vamambo.

6Chigaro chenyu choushe, imi Mwari,

chiripo nokusingaperi–peri;

Tsvimbo youshe hwenyu itsvimbo yakarurama.

7Makada kururama, mukavenga kusarurama;

Naizvozvo Mwari, Mwari wenyu wakakuzodzai

Namafuta okufara kupfuura shamwari dzenyu.

8Nguo dzenyu dzose dzinonhuwira

nemura nearosi neakashia;

Madimbwa akakufadzai achiridzwa

mudzimba dzamambo dzenyanga dzenzou.

9Vakunda vamadzimambo vari pakati

pavanhukadzi venyu vanokudzwa;

Paruoko rwenyu rworudyi vahosi

vamire vakashonga ndarama yeOfiri.

10Teerera mukunda, rangarira, urereke nzeve yako;

Kanganwawo vanhu vako, neimba yababa vako;

11Ipapo mambo achada kunaka kwako;

Nokuti ndiye Ishe wako; unamate kwaari iwe.

12Uye mukunda weTiro achavapo nechipo;

Vapfumi pakati pavanhu vachakumbira ngoni dzako.

13Mukunda wamambo akanaka

kwazvo–kwazvo mukati meimba yamambo;

Nguo dzake dzakarukwa nendarama.

14Uchaperekwa kuna mambo nenguo

dzakarukwa dzina mavara;

Mhandara, shamwari dzake dzinomutevera,

Vachaiswa kwamuri.

15Vachaperekwa nomufaro nokufarisisa;

Vachapinda mumba mamambo.

16Panzvimbo yamadzibaba ako vana vako vachavapo,

Vauchaita machinda panyika yose.

17Ndichayeudzira zita renyu kusvikira kumarudzi ose;

Naizvozvo ndudzi dzavanhu

dzichakuvongai nokusingaperi–peri.