Mapisarema 69 - Shona Bible Union Version 2002（SUB）

Munyengetero waDhavhidhi pakutambudzika kukuruKumutungamiriri wokuimba; nomuimbirwo weShoshanimi. Pisarema raDhavhidhi.

1Ndiponesei, Mwari,

Nokuti mvura zhinji yasvikira

pamweya wangu.

2Ndinonyura munhope yakadzika, pasina pokumira;

Ndakasvika pamvura zhinji yakadzika,

pandinofukidzwa nenzizi.

3Ndaneta nokuchema kwangu; huro dzangu dzaoma;

Meso angu anovava nokurindira Mwari wangu.

4Vanondivenga ndisina mhosva vazhinji

kupfuura vhudzi romusoro wangu;

Avo vanoda kundiparadza vane simba,

kunyangwe vachindivenga ndisina mhosva;

Ndakafanira kudzosera zvandinenge ndisina kutora.

5Mwari munoziva upenzi hwangu;

Mhosva dzangu hadzina kukuvanzirwai.

6Ishe Mwari wehondo, vanokurindirai

ngavarege kunyadziswa nokuda kwangu;

Mwari waIsiraeri, vanokutsvakai

ngavarege kuzvidzwa nokuda kwangu.

7Nokuti ndakatenda kushorwa nokuda kwenyu;

Kunyadza kwakafukidza chiso changu.

8Ndakava mutorwa kuhama dzangu,

Nomubvakure kuvana vamai vangu.

9Nokuti kushingairira imba yenyu kwakandipedza;

Nokushora, kwavanokushorai

kwakawira pamusoro pangu.

10Panguva yokuchema kwangu nokutambudza

mweya wangu ndichizvinyima,

Ndakashorwa nokuda kwazvo.

11Panguva yandakafuka masaga

ndikaaita nguo dzangu,

Ndakava tsumo pakati pavo.

12Vanogara pasuwo vanondireva;

Ndiri chiimbo chavakabatwa nedoro.

13Asi kana ndirini, munyengetero

wangu uri kwamuri, Ishe, panguva yakafanira;

Mwari, netsitsi dzenyu zhinji

Ndipindurei nokuponesa kwenyu kwakatendeka.

14Ndirwirei munhope, ndirege kunyura;

Ndirwirwe kuna vanondivenga,

napamvura zhinji yakadzika.

15Boporodzi remvura rirege kundikunda,

Mvura yakadzika irege kundimedza;

Gomba rirege kuzarira muromo

waro pamusoro pangu.

16Ndipindurei, Jehovha;

nokuti unyoro hwenyu hwakanaka;

Ringirai kwandiri nokuda kwetsitsi dzenyu zhinji.

17Regai kuvanzira muranda wenyu chiso chenyu;

Nokuti ndiri pakutambudzika;

kurumidzai kundipindura.

18Swederai kumweya wangu, muudzikinure;

Ndidzikinurei nokuda kwavavengi vangu.

19Munoziva kushorwa kwangu,

nokunyadzwa kwangu nokuzvidzwa kwangu;

Vadzivisi vangu vose vari mberi kwangu.

20Kushora kwakaputsa mwoyo wangu;

ndaremerwa kwazvo;

Ndakatsvaka vangandinzwira nyasha,

asi kwakanga kusina munhu;

Ndakatsvaka vavaraidzi, asi handina kuwana nomumwe.

21Vakandipa nduru zvive zvokudya zvangu;

Pakunzwa nyota kwangu vakandinwisa vhiniga.

22Tafura yavo ngaive musungo pamberi pavo;

Neriva, kana vakagarika havo.

23Meso avo ngaapofomadzwe, varege kuona,

Zviuno zvavo ngazvirambe zvichiguda–guda.

24Dururai kutsamwa kwenyu pamusoro pavo,

Hasha dzenyu dzinopfuta, ngadzivabate.

25Ugaro hwavo ngahuparadzwe;

Ngakurege kuva nomunhu anogara pamatende avo.

26Nokuti vanotambudza uyo wamakarova;

Vanotaura zvokurwadziwa kwavaya vamakakuvadza.

27Wedzerai zvakaipa pazvakaipa zvavo;

Ngavarege kupinda pakururama kwenyu.

28Ngavadzimwe parugwaro rwoupenyu,

Varege kunyorwa pamwechete navakarurama.

29Asi ini ndiri murombo, ndinorwadziwa;

Kuponesa kwenyu, Mwari, ngakundiise pakakwirira.

30Ndicharumbidza zita raMwari norwiyo,

Ndichamukudza nokuvonga.

31Izvo zvichafadza Jehovha kupfuura nzombe,

Kana hando ine nyanga namahwanda.

32Vanyoro vakazviona vakafara;

Imi munotsvaka Mwari, mwoyo yenyu ngairarame.

33Nokuti Jehovha anonzwa vashaiwi,

Haashori vasungwa vake.

34Kudenga napasi ngazvimurumbidze,

Makungwa, nezvose zvinopfakanyikamo.

35Nokuti Mwari achaponesa Zioni,

nokuvaka maguta aJudha;

Vachagaramo, ive nhaka yavo.

36Ichava nhaka yavana vavaranda vake;

Vanoda zita rake vachagaramo.