Mapisarema 112 - Shona Bible Union Version 2002（SUB）

Kuropafadzwa kwomunhu anoda Jehovha

1Hareruya!

Akaropafadzwa munhu anotya Jehovha,

Anofarira zvikuru mirairo yake.

2Vana vake vachava nesimba pasi;

Rudzi rwowakarurama rucharopafadzwa.

3Pfuma nezvakawanda zviri mumba make;

Kururama kwake kunogara nokusingaperi.

4Akarurama anobudirwa nechiedza parima;

Iye ane nyasha, netsitsi nokururama.

5Ane mufaro munhu uyo anoita

nenyasha, anopa chikwereti;

Acharuramisirwa mhaka yake pakutonga.

6Nokuti haangatongozununguswi;

Akarurama acharamba achirangarirwa nokusingaperi.

7Haangatyi mashoko ezvinhu zvakaipa;

Mwoyo wake wakasimba, uchavimba naJehovha.

8Mwoyo wake wakasimbiswa, haangatyi,

Kusvikira aona kukundwa kwavadzivisi vake.

9Akaparadzira, akapa vashaiwi;

Kururama kwake kunogara nokusingaperi;

Runyanga rwake ruchakwiridzwa nokukudzwa.

10Akaipa achazviona, ndokufa neshungu;

Achageda–geda meno ake, ndokunyauka;

Kuda kwowakaipa kuchaparara.