Mapisarema 145 - Shona Bible Union Version 2002（SUB）

Jehovha ngaarumbidzwe nokuti ndiye anotipa zvosePisarema rokurumbidza; raDhavhidhi.

1Ndichakukudzai kwazvo,

Mwari wangu, imi Mambo;

Ndicharumbidza zita renyu nokusingaperi–peri.

2Ndichakurumbidzai zuva rimwe nerimwe;

Ndichakudza zita renyu nokusingaperi–peri.

3Jehovha mukuru, anofanira

kurumbidzwa kwazvo;

Ukuru hwake haunganzverwi.

4Rudzi rumwe rucharumbidza

mabasa enyu kuno rumwe,

Vachadudzira zvamakaita zvine simba.

5Ndichafungisisa kubwinya kwoumambo

hwenyu hunokudzwa,

Namabasa enyu anoshamisa.

6Vanhu vachataura vachireva simba

ramabasa enyu anotyisa;

Neni ndichadudzira ukuru hwenyu.

7Vachareva vachiyeudzira kunaka

kwenyu kukuru,

Nokuimbira kururama kwenyu.

8Jehovha ane nyasha, azere netsitsi,

Haachimbidziki kutsamwa, ane ngoni zhinji.

9Jehovha ano mwoyo wakanaka kuna vose;

Ngoni dzake dziri pamabasa ake ose.

10Mabasa enyu ose achakuvongai Jehovha;

Navatsvene venyu vachakurumbidzai.

11Vachataura vachireva kubwinya kwoushe hwenyu,

Nokuparidza simba renyu;

12Kuti vazivise vanakomana vavanhu

mabasa ake ane simba,

Nokubwinya kwoumambo hwohushe hwake.

13Ushe hwenyu ndihwo ushe husingaperi,

Noumambo hwenyu huchagara nokusingaperi.

14Jehovha anotsigira vose vanowa,

Anosimudza vose vakakotamiswa pasi.

15Meso avose anotarira kwamuri;

Munovapa zvokudya zvavo panguva yakafanira.

16Munotadzanura ruoko rwenyu,

Ndokugutisa zvipenyu zvose.

17Jehovha akarurama panzira dzake dzose,

Ane nyasha pazvose zvaanoita.

18Jehovha ari pedyo navose vanodana kwaari,

Vose vanodana kwaari nezvokwadi.

19Achaitira vanomutya sezvavanoda;

Achanzwawo kudanidzira kwavo; ndokuvaponesa.

20Jehovha anochengeta vose vanomuda;

Asi vakaipa achavaparadza vose.

21Muromo wangu uchataura

kurumbidzwa kwaJehovha;

Vanhu vose ngavarumbidze zita rake

dzvene nokusingaperi–peri.