Mapisarema 62 - Shona Bible Union Version 2002（SUB）

Kunyarara kwomweya womunhu anovimba naMwariKumutungamiriri wokuimba; nomutoo waJedhutuni. Pisarema raDhavhidhi.

1Zvirokwazvo, mweya wangu unongorindira Mwari;

Kwaari ndiko kunobva kuponeswa kwangu.

2Ndiye oga dombo rangu nomuponesi wangu;

Ndiye shongwe yangu yakakwirira;

handingazununguswi zvikuru.

3Muchavavarira munhu kusvikira rinhiko,

Kuti mumuuraye imi mose,

Sorusvingo runoda kuwa, noruzhowa runotseyama?

4Vanongorangana kuti vamusundire

pasi abve paukuru hwake;

Vanofarira nhema;

Vanoropafadza nomuromo wavo,

asi vanotuka mumwoyo mavo.

5Mweya wangu, rindira Mwari zvirokwazvo;

Nokuti ndinomutarira iye.

6Ndiye oga dombo rangu noruponeso rwangu;

Ndiye shongwe yangu yakakwirira;

handingazununguswi.

7Kuna Mwari ndiko kuno kuponeswa

kwangu nokukudzwa kwangu;

Dombo resimba rangu noutiziro

hwangu zviri kuna Mwari.

8Vimbai naye nguva dzose, imi vanhu;

Dururai mwoyo yenyu pamberi pake;

Mwari ndiye utiziro hwedu.

9Zvirokwazvo vanhu vasingakudzwi

mweya chete, uye vanhu vanokudzwa inhema;

Pakuyerwa havaremi;

Vose pamwechete vakareruka kupfuura mweya.

10Regai kuvimba nokumanikidza,

Regai kuzvikudza pamusoro pokupambara;

Kana pfuma ichiwanda, regai kuinamatira nomwoyo.

11Mwari akataura kamwechete,

Ndakazvinzwa kaviri;

Kuti simba nderaMwari;

12Netsitsiwo ndedzenyu, Ishe;

Nokuti munoitira munhu mumwe

nomumwe sezvaakabata.