Rwiyo Rukuru rwaSoromoni 7 - Shona Bible Union Version 2002（SUB）

1Tsoka dzako dzakanaka seiko

mushangu, iwe mukunda womuchinda!

Hudyu dzako, dzakatendereka, dzakaita sezvishongo,

Basa ramaoko emhizha.

2Guvhu rako rakaita somukombe wakatendereka,

Musingashaikwi waini yakavhenganiswa;

Chiuno chako chaita sedutu rezviyo

Rakakomberedzwa namaruva.

3Mazamu ako maviri akafanana navana vemharapara,

Vana vakaberekwa vari vaviri.

4Mutsipa wako wakaita seshongwe

yorunyanga rwenzou;

Meso ako samakuvi paHeshibhoni,

Pasuwo reBhatirabhimi;

Mhindo dzako dzakafanana neshongwe yeRebhanoni

Yakatarisana neDhamasikosi.

5Musoro wako pamusoro pako wakafanana neKarimeri;

Nevhudzi romusoro wako nomucheka mutsvuku;

Mambo akasungwa nevhudzi rakapetana.

6Wakanaka sei, unogadza sei,

Mudiwa, pakati pezvinofadza.

7Chimiro hwako hwakafanana nomuchindwe,

Namazamu ako namasumbu ezvibereko zvawo.

8Ndakati, ndichakwira mumuchindwe,

Ndibate matavi awo;

Mazamu ako ngaave samasumbu emizambiringa,

Nokunhuwira kwemhino dzako

sokunhuwira kwamaeporo,

9Nomuromo wako sewaini yakaisvonaka,

Inotapira mudikanwa wangu pakunwiwa kwayo,

Inoyerera pamiromo yavavete.

10Ndini womudiwa wangu;

Kuda kwake kunondivinga.

11Uya mudiwa wangu, ngatibudire kusango,

Ngatigare mumisha.

12Ngatifumire kuminda yemizambiringa;

Tinoona kana muzambiringa watunga;

Kana maruva akura,

Kana matamba atunga maruva;

Ndipapo pandichakupa rudo rwangu.

13Mudiwadiwa anobudisa kunhuhwira.

Pamikova yedu pane zvinonaka

zvamarudzi ose, zvitsva nezvitsaru,

Zvandakakuchengetera, iwe mudiwa wangu.