Mapisarema 75 - Shona Bible Union Version 2002（SUB）

Rwiyo rwokuvonga MwariKumutungamiriri wokuimba; nomuimbirwo weAritasheti. Pisarema raAsafi. Rwiyo.

1Tinokuvongai, Mwari;

Tinovonga, nokuti zita renyu riri pedyo;

Vanhu vanoparidza mabasa enyu anoshamisa.

2“Kana ndichiwana nguva yakafanira,

Ndichatonga zvakarurama.

3Pasi pose panyauka navose vagerepo;

Ndini ndakamisa mbiru dzayo.

4Ndakati kuna vana manyawi,

‘Regai kuita namanyawi;’

Nokuna vakaipa,

‘Regai kusimudza runyanga.’

5Regai kusimudza runyanga rwenyu kudenga;

Regai kutaura nomutsipa mukukutu.”

6Nokuti kunyangwe kumabudazuva, kana kumavirira,

Kana kurenje, hakuzi ikoko kunobva kukudzwa.

7Asi Mwari ndiye mutongi;

Anoninipisa mumwe achikudza mumwe.

8Nokuti muruoko rwaJehovha

muno mukombe, newaini inopupuma;

Uzere nezvakavhenganiswa, zvino anodurura mauri;

Zvirokwazvo, vakaipa vose venyika

vachasvina masese awo, nokuanwa.

9Asi ini ndichaparidza nokusingaperi,

Ndichaimbira Mwari waJakobho nziyo dzokurumbidza.

10Nyanga dzose dzavakaipa ndichadzigura;

Asi nyanga dzavakarurama dzichasimudzwa.

Kumutungamiriri wokuimba; nemitengeranwa. Pisarema raAsafi. Rwiyo.