Dhanierig 3 - Shona Common Language Interconfessional Bible（SCLBD）

MUNAMATO WAAZARIYA WOKUTENDA MWARI

24 Vakafamba–famba vari mumarimi omoto

vachiimbira Mwari vachirumbidza Tenzi.

25(25) Azariya akamira mukati memoto wacho

akanamata achiti,

26(26) “Ngaarumbidzwe Tenzi Mwari wamadzibaba edu

akakodzera kukudzwa;

mbiri yezita renyu ikurumbire narini wose,

27(27) nokuti zvose zvamakaita kwatiri

makazviita noruenzaniso,

kuita kwenyu kwose kuri pachokwadi

uye makwara enyu akarurama,

zvamunotema zvose pakutonga zviri mugwara chaimo.

28(28) Zvamakatitemera isu pakutonga, ndizvo chaizvoizvo,

muna zvose zvazvo zvamakatipinza mazviri

nezvamakapinza Jerusaremu, guta rinoera

ramadzitateguru edu nokuti makaita zviri

pachokwadi zvino ruenzaniso pamakatipinza

mune zvose izvozvi, taparirwa nezvitadzo zvedu

29(29) nokuti takatadza mune zvose

tikatyora mutemo nokutsauka kwatakaita kwamuri

uye takatadza muzvinhu zvose

tikarega kuteerera mitemo yenyu.

30(30) Hatina kuchengeta kana kuitevedza

sezvamakanga mati tiite

kuitira kuti zvitifambire zvakanaka.

31(31) Nokudaro zvose zvamakati zvitiwire

nezvose zvamakaita kwatiri,

makazviita nomazvo chaimo.

32(32) Makatiisa mumaoko evavengi vedu

vanhu vasina murau,

mhandupandu dzevanhu chaidzo

vane mwoyo wakaipisisa kwazvo.

Makatiisawo mumaoko amambo

asingaiti zvino ruenzaniso

muipi wokupedzesera pasi pose zvapo.

33(33) Kutaura kuno hatichambobvumirwa

kana kuti muromo bufu.

Varanda venyu uye vanokunamatai,

chavo chete kwangova kunyara nokufumuka.

34(34) Pamusana pezita renyu

regai kubva matirasa zvachose.

Musatyore chitenderano chenyu nesu.

35(35) Tsitsi dzenyu ngadzirege kupera kwatiri kuri

kuitira Abhurahamu munhu wenyu wapamwoyo

nomuranda wenyu Isaki

uye munhu wenyu mutsvene Isiraeri.

36(36) Vamakavimbisa kuti vana vavo

vachawanda senyenyedzi dzedenga

uye sejecha rokumahombekombe egungwa

37(37) nokuti isu tangova katsama kavanhu

pakati pemamwe marudzi ose

uye tangova vapasipasi panyika pose

pamusana pezvitadzo zvedu.

38(38) Pari nhasi hatina mutongi kana muporofita,

kunyange mutungamiriri kana mupiro wokupisa

chibairo kana mupiro zvawo, kunyange rusenzi.

Hapana kana nzvimbo yokupirira

kwamuri zvitsva zveminda yedu kuti tiitirwe

tsiye nyoro nemi.

39(39) Dai nemwoyo wedu wokupfidza nokuzvidukupisa

tangovewo vanhu vanogamuchirika kwamuri

sokunge tina mipiro yokupisa yehondohwe

nehandira uye sokunge tine makumi namakumi

ezviuru zvehwayana dzakakora.

40(40) Izvozvo ndizvo zvaifanira kunge zvakaita

chibairo chedu kwamuri nhasi uno.

Dai tangokuteverai nomwoyo wose

nokuti vanovimba nemi havanyadziswi.

41(41) Zvino tinokuteverai nomwoyo wose;

tinokutyai uye tinokutsvagai.

42(42) Musatinyadzise asi tiitireiwo mwoyo murefu

nengoni dzenyu dzakawanda.

43(43) Tinunureiwo namaitiro enyu anoshamisa,

kuti zita renyu imi Tenzi rirumbidzwe.

44(44) Nyadzisai waro vanoita zvinokuvadza varanda venyu;

ngavanyadziswe nokutorerwa masimba ose noutongi,

simba ravo riparare,

45(45) vazive kuti imi Tenzi

ndimi Mwari chete

anomukurumbira pasi pose.”

46(46) Izvozvo varanda vamambo vaya vakanga vavakandamo havana kumbomira kupovorera moto muvira iroro vachiisa zvinhu zvisingatane kubata moto netara noubvurubvuru nehuni.

47(47) Rimi romoto rakagotogoka mudenga kumusoro kwevira romoto zvokutoita makumi maviri amamita.

48(48) Moto wakanganduka ukavavira vamwe vaKaridhea vaiva pavira ipapo.

49(49) Asi mutumwa waTenzi akaburukira muvira imomo kuti ave naAzariya navamwe vake akafuridzira rimi romoto kunze kwevira iroro,

50(50) akaita kuti pakati pevira pave nakamwando kaifefetera zvokuti moto hauna kana kumbovabata kana kuvakuvadza kunyange kuvatambudza.

Rwiyo rwamajaya matatu

51(51) Ndipo pakatanga majaya matatu aya

kuimba ose pamwechete ari mumoto

achiimba nokurumbidza Mwari achiti,

52(52) “Tinokurumbidzai imi Tenzi

Mwari wamadzibaba edu

tinokukudzai nokukurumbidzai zvikuru

kwazvo narini wose.

53(53) Ngarirumbidzwe zita renyu

rinoera rinomukurumbira

ngarirumbidzwe kwazvo rikudzwe kwazvo nokusingaperi.

54(54) Tinokurumbidzai kwazvo

muTemberi yenyu yembiri inoera

mupembererwe waro nokupiwa mbiri

yakakura kwazvo narini wose.

55(55) Tinokurumbidzai imi mugere pamakerubhi,

imi mune ziso rakatarisa muhwenje

ngarirumbidzwe nokukudzwa kwazvo nokusingaperi.

56(56) Tinokurumbidzai pachigaro choumambo hwenyu.

Dai mapembererwa nokupiwa mbiri yakakura kwazvo

narini wose.

57(57) Tinokurumbidzai muziendanakuenda romudenga

munofanira kuimbirwa nokurumbidzwa

narini wose.

58(58) Imi zvisikwa zvose zvaTenzi,

rumbidzai Tenzi,

muimbirei mumurumbidze kwazvo narini.

59(59) Imi matenga,

rumbidzai Tenzi,

muimbirei mumurumbidze kwazvo narini.

60(60) Imi vatumwa vaTenzi,

rumbidzai Tenzi,

muimbirei mumurumbidze kwazvo narini.

61(61) Mvura dzose dziri kumatenga

rumbidzai Tenzi,

muimbirei mumurumbidze kwazvo narini.

62(62) Imi masimba ose

rumbidzai Tenzi,

muimbirei mumurumbidze kwazvo narini.

63(63) Zuva nomwedzi,

rumbidzai Tenzi,

muimbirei mumurumbidze kwazvo narini.

64(64) Nyenyedzi dzedenga,

rumbidzai Tenzi,

muimbirei mumurumbidze kwazvo narini.

65(65) Dova nemvura yose inonaya,

rumbidzai Tenzi,

muimbirei mumurumbidze kwazvo narini.

66(66) Imi mhepo nedzimhepo

rumbidzai Tenzi,

muimbirei mumurumbidze kwazvo narini.

67(67) Moto nokudziya

rumbidzai Tenzi,

muimbirei mumurumbidze kwazvo narini.

68(68) Chando namadziya

rumbidzai Tenzi,

muimbirei mumurumbidze kwazvo narini.

69(69) Dova namazaya echando,

rumbidzai Tenzi,

muimbirei mumurumbidze kwazvo narini.

70(70) Imi usiku namasikati,

rumbidzai Tenzi,

muimbirei mumurumbidze kwazvo narini.

71(71) Chiedza nerima,

rumbidzai Tenzi,

muimbirei mumurumbidze kwazvo narini.

72(72) Mazaya echando nokutonhora,

rumbidzai Tenzi,

muimbirei mumurumbidze kwazvo narini.

73(73) Chando chakachena namazaya echando akachena,

rumbidzai Tenzi,

muimbirei mumurumbidze kwazvo narini.

74(74) Imi mheni namakuti,

rumbidzai Tenzi,

muimbirei mumurumbidze kwazvo narini.

75(75) Pasi pose ngaparumbidze Tenzi

ngapamuimbire

nokumurumbidza kwazvo nokusingaperi.

76(76) Imi makomo netukomo,

imbirai Tenzi

murumbidzei kwazvo nokusingaperi.

77(77) Zvinhu zvose zvinomera pasi,

rumbidzai Tenzi,

muimbirei mumurumbidze kwazvo narini.

78(78) Imi zvisipiti,

rumbidzai Tenzi,

muimbirei mumurumbidze kwazvo narini.

79(79) Imi makungwa nenzizi,

rumbidzai Tenzi,

muimbirei mumurumbidze kwazvo narini.

80(80) Imi zvikara zvomunyanza,

nemi zvipenyu zvose zvinogara mumvura

rumbidzai Tenzi,

muimbirei mumurumbidze kwazvo narini.

81(81) Imi shiri dzose dzedenga

rumbidzai Tenzi,

muimbirei mumurumbidze kwazvo narini.

82(82) Imi zvikara zvesango nemombe

rumbidzai Tenzi,

muimbirei mumurumbidze kwazvo narini.

83(83) Imi vanhu,

rumbidzai Tenzi,

muimbirei mumurumbidze kwazvo narini.

84(84) Imi vaIsiraeri,

rumbidzai Tenzi,

muimbirei mumurumbidze kwazvo narini.

85(85) Imi vapristi vaTenzi,

rumbidzai Tenzi,

muimbirei mumurumbidze kwazvo narini.

86(86) Imi varanda vaTenzi,

rumbidzai Tenzi,

muimbirei mumurumbidze kwazvo narini.

87(87) Imi mweya,

nemi mweya yavakarurama,

rumbidzai Tenzi,

muimbirei mumurumbidze kwazvo narini.

88(88) Imi vatsvene,

nemi vane mwoyo wokuzvirereka,

rumbidzai Tenzi,

muimbirei mumurumbidze kwazvo narini.

89(89) Imi vana Hananiya naAzariya naMishaeri,

imbirai Tenzi

murumbidzei kwazvo nokusingaperi

nokuti akatinunura kunzvimbo yavafi,

akatinunura mumaoko orufu

akatinunura muvira romoto unopisa kwazvo

akatinunura mukati momoto.

90(90) Tendai Tenzi nokuti akanaka

nokuti mwoyochena wake hauperi.

91(91) Imi mose munonamata Tenzi

Mwari wavamwari

muimbirei mutendhe

nokuti mwoyochena wake hauperi.”