Ungwaru 18 - Shona Common Language Interconfessional Bible（SCLBD）

1Asi kuvanhu venyu vatsvene kwakanga kwakachena

zvikuru kwazvo.

VaIjipiti vainzwa kutaura kwavaIsiraeri asi vakanga

vasingavaoni chimiro chavo.

Vaitoti, “Vakakomborerwa zvavo vasingaoneswi nhamo.”

2Vakavatenda nokuti vaIsiraeri havana kuvatsividza

kunyange zvazvo vakanga vavatadzira,

vakakumbira kuregererwa

kusawirirana kwavo navo.

3Naizvozvo vana venyu, hamuna kuvatibikira nerima,

asi makavapa zirimi romoto,

kuti rivatungamirire nzira

yerwendo rwavakanga vasingazivi;

uye kuti rivewo zuva risingakuvadzi

rorwendo rwokutama

kwavo rune mbiri.

4Asi vavengi vavo vakanga vachikodzera

kunyimwa chiedza, vakapfigirwa murima,

nokuti vakanga vaita vana venyu varanda vavo,

vaizoshandiswa kuti mwenje

usingadzimiki womutemo wenyu upiwe pasi pose.

VaIjipiti navaIsiraeri: Rufu rwamatangwe eIjipiti

5Zviya zvakaita vaIjipiti bangano rokuuraya vana

vaduku vavaIsiraeri,

mwana mumwechete akanga araswa,

ndiye akazoponeswa,

makazoranga vaIjipiti nokuvatorera

mazana namazana avana vavo,

makavaparadza pamwechete

namafashamo emvura.

6Usiku hwacho ihwohwo hwakanga

hwakafanoziviswa madzibaba edu,

kuitira kuti vasimbaradze nechokwadi chaicho

chezvitsidzirano zvavakanga

vasimba nazvo.

7Kuponeswa kwavarurami

nokuparadzwa kwavavengi vavo, ndizvo

zvavaitarisirwa navanhu venyu

8nokuti nokuranga ikoko kwamakaita vavengi vedu

makatidaidza kwamuri mukatiwanisa mukurumbira.

9Vana vavarurami vakazvipira kunaMwari

vakapira zvibairo zvepachiwande

nomwoyo mumwechete vose vakabvuma mutemo waMwari,

wokuti vose vachava vakarurama nomugove wakangoenzana,

zvakanaka nezvakaipa;

nguva yakareyo vakatenge

voimba nziyo dzamadzibaba avo.

10Asi vakanzwa maungira emheremhere dzavavengi vavo,

pamwe nokugurukuta vachichema vana vavo kwakanzwika kure.

11Muranda airangwa zvimwechetezvo zvaiitwa tenzi wake.

Nhamo yaiwira munhuwo zvake,

ndiyowo yaiwira mambo.

12Vose vakawirwa norufu rumwecheterwo,

zvitunha zvakanga zvisingaverengeki,

vapenyu vakanga vasingakwani kuviga vakafa,

nokuti nenguva imwe yoga

vana vavo vakakosha vakaparara.

13Kunyange zvazvo vakanga vasina kutenda

zvose pamusana pamaminimini avo,

asi pakazoparadzwa matangwe avo,

vakazobvuma kuti Isiraeri mwana waMwari.

14Kuzoti pasi pose pachiti ziro–o,

ihwo usiku husingatani kuedza hwakwana hwava pakati pahwo

15ndopakabva kudengadenga izwi renyu rine simba guru

richisvetukira pasi richibva pachigaro

chenyu choumambo; rakasvika panyika

yakanga yapinda nhamo

richinge murwi asina tsitsi,

16ane bakatwa rinopinzwa romutemo wenyu wapachokwadi.

Parakati dzi, rakabva razadza nyika yose norufu;

raisvika kudenga iro rakamira pasi.

17Vanhu ndokubva vabatwa nokutya

nezvinhu zvavaiona mukurota,

vakawirwa nokutya kwavakanga vasingambofungiri.

18Vakati pasi rapata vachitandadza, vachiti mumwe

apo mumwe apo.

Iko kufa kwavo kwairatidza kwoga kuti

chavaifira chii,

19nokuti zvavakanga varota zviya zvaivadzongodza mwoyo,

zvakafanovayambira,

kuitira kuti varege kungoparara

vasingazivi kuti vari kufirei.

Munamato waAroni wakaponesa vaIsiraeri kurufu

20Asi kana varuramiwo rufu irworwu rwakavabata,

denda rakawira vazhinji mugwenga

asi hasha dzacho hadzina kuramba dzichienda mberi

21nokuti munhu akarurama akabva akurumidza kuvamiririra.

Akatora nhoo yebasa rake,

zvinoti munamato nomuteuro

werusenzi wokupfupira zvitadzo.

Akapodza hasha dzenyu,

achiita kuti denda rimiswe,

zvikaratidza kuti muranda wenyu.

22Akagumisa hasha idzodzo,

kwete nokugwinya kwomuviri wake,

kana nesimba rehondo

asi akatonhodza murangi nezwi rake,

nokumuyeuchidza zvitsidzirano

nezvitenderano zvakanga

zvaitwa kumadzibaba edu.

23Zvakati zvitunha zvaita mirwi,

akamira pakati pavapenyu nemi,

kuti hasha dzenyu

dzirege kuenda kuvapenyu.

24Gemenzi rake raimirira pasi pose,

mazita anomukurumbira amadzibaba edu

akanga akanyorwa pamatombo anokosha

akanga akaita mitsara mina,

zita renyu rakanga rakanyorwa

pangundu yomumusoro make.

25Izvi zvakaita kuti muparadzi amire, atye;

nokuti kuratidza kwamakaita hasha dzenyu

kwoga kwakanga kwakakwana.