Bharuku 5 - Shona Common Language Interconfessional Bible（SCLBD）

1“Jerusaremu chibvisa zvako chipfeko chako

“Chenhamo namatambudziko

upfeke nokusingaperi runako rwembiri

yaunopiwa naMwari.

2Pfeka hanzu yoururami

hunobva kuna Mwari.

Pfeka mumusoro chiremba

chokubwinya kwokuvapo kwaChidzachepo.

3Mwari acharatidza kupenya kwako

kosekose pasi pedenga.

4Chikonzero chacho ndechokuti

Mwari achakudaidza narini wose zita rokuti,

‘Ururamirugare uye rokuti Unamatiimbiri.’

5Simuka Jerusaremu

undokwira pakakwirira

utarise kumabvazuva

uone vana vako vakaungana

vachibva kumabvazuva nokumadokero

vachidaidzwa nezwi rimwechete.

Varikufara kuti Mwari avayeuka.

6Vakabva kwauri vachifamba netsoka

vachitinhwa navavengi

asi Mwari achavadzosa kwauri

vachiremekedzwa zvokunge vari

pachigaro choumambo,

7chinotidariso ndechokuti,

Mwari akati makomo marefu

nezvikomo zvapasichigare

zviparadzirwe.

Nhika akati dzifushirwe

kuitira kuti vafambe zvakanaka

vari mukati mokupenya kokuvapo kwaMwari.

8Matondo ose nemiti yose inonhuwira

ichapa Isiraeri mumvuri

sezvakatemwa naMwari kuti zviitwe.

9Mwari achatungamirira Isiraeri norufaro

muchiedza chokupenya kwokuvapo kwake

uye netsitsi noururami hunobva kwaari.”