Sira 40 - Shona Common Language Interconfessional Bible（SCLBD）

Nhamo dzomunhu

1Munhu wose ane basa rinorema raakatemerwa kuita

pamutsipa yavana vaAdhamu pane joko rinorema,

kubvira zuva ravakabuda munhumbu yaamai vavo,

kusvikira zuva ravanodzokera munhumbu yaamai vavose;

2chinovadzongodza mwoyo nokuvatambudza ipfungwa

kutya zuva rokufa.

3Kubvira kuna mambo agere

pachigaro choumambo chakanakisisa,

dakara kuno munhuwo zvake agere muhuruva nedota;

4kubvira kuna anopfeka hanzu dzoruvara rwehute

nechiremba choumambo

dakara kuna akapfeka saga,

dzinongova hasha neshanje noruchiva nenyonganyonga,

nokukangaidzwa,

nokutya rufu, namapitse namakakatanwa.

5Kunyange usiku, kana munhu oti ndochizorora,

hope dzake dzinotomukangaidza.

6Akangoti vatei,

anoita sezvinonzi masikati chaiwo,

anorota hope dzinotyisa ovhunduka,

achiita saanotiza hondo.

7Paanongoti punyukei, anobva apepuka,

oshama kuti inga, chaari kutya hapana.

8Izvi ndozvinesu tose, vanhu nemhuka,

asi kuvatadzi zvakatopetwa kanomwe.

9Rufu neropa, namakakatanwa nebakatwa,

namatambudziko nenzara, jambwa nenhamo nedenda,

10zvose izvozvi zvakasikirwa vatadzi,

uye pamusana pavo kwakauya mafashamo emvura aya.

11Zvose zvinobva kuvhu zvinodzokerawo kuvhu,

zvinobva mumvura zvinodzokerawo munyanza.

Kubudirira kwomuipi kuno mugumo

12Pfumbamuromo nokutonga kwose kusakarurama zvichadzimwa,

asi kutendeka ndiko kunogara nokusingaperi.

13Upfumi hwavakaipa huchapwa sorwizi runopopoma,

huchaita semheni pakunaya, inoti, “Pwaa!” Yobva yati, “Zi!”

14Mupanegombe achafara

ndizvowo zvina vadariki voMutemo,

vachaparadzwa zvachose.

15Vana vavanhu vasiri vanamati havaiti mapazi mazhinji,

nokuti midzi yakanyangara iri paruware.

16Tsanga inomera munyasi morwizi namose mune mvura,

ndiyo inotanga kudzurwa.

17Mutsa wakafanana nebindu rezvikomborero

mwoyochena unogara nokusingaperi.

Zvinhu zvoupenyu zviri nani

18Munhu ane basa rake pachake

neanopinda basa kune mumwe

vanoupenyu hunovanakira;

asi anowana upfumi ari nani pavari vose.

19Vana uye kuvaka guta kunoita kuti

munhu asiye zita, asi munhu

akawana ungwaru ane zita riri nani.

20Waini nenziyo zvinofadza mwoyo

asi kuda ungwaru kuri nani kupinda zvose zviri zviviri.

21Tsuri nedimbwa zvinoimba zvinonakidza,

asi izwi rinoimba zvakanaka

riri nani kupinda zviri zviviri.

22Runako nokufamba zvinoyevedza zvinofadza meso

asi mumera wembeswa uri nani kupinda izvi zvose.

23Zvakanaka kuva neshamwari kana sahwira asi

kuva murume nomukadzi kuri nani.

24Hama nomubatsiri vakanaka panguva yenhamo,

asi mwoyochena kuvarombo unonunura kuvapinda.

25Sirivha nendarama zvinotsigisa munhu,

asi zano rakanaka upfumi kupinda zvose zviri zviviri.

26Mari noukuru zvinosimbaradza mwoyo,

asi kutya Mwari kuri nani kutozvipfuura.

Anotya Mwari hapana chaanoshaya,

nako zvokutsvaga rubatsiro hapana.

27Kutya Mwari kwakafanana nebindu rezvikomborero

kunochengeta munhu zviri nani kupinda mbiri iri yose.

Kupemha

28Mwanangu, usagare upenyu hwokungopemha,

zviri nani kufa pano kupemha.

29Kana upenyu hwomunhu hwava hwokungokwata chete,

upenyu hwake hauchisiri upenyu.

Anozviitisa munhu pasina pamusana pezvokudya zvavamwe,

asi munhu ane unhu, akadzidziswa, haamboiti izvi.

30Munhu anopemha anogona kunatsa mukanwa

pamusana pokushaya nyadzi

asi mukati make zvinomurwadza.