Sira 18 - Shona Common Language Interconfessional Bible（SCLBD）

Ukuru ukuru hwaMwari

1Chidzachapo ndiye musiki wazvose zvose.

2Mwari chete ndiye anganzi mururami.

4Aripo here, akaitwa naMwari kuti ave

wokuparidza mabasa ake?

Ndianiwo angatsvagurudze mabasa ake esimba?

5Ndianiwo angagone kuera masimba ake makuru–kuru?

Ndiani zvake angagona kutsanangudza tsitsi dzake?

6Haagoni kupamhidzirwa kana kutapudzwa.

Zvishamiso zvaMwari hazvigoni kuerwa

7nokuti kana munhu oti ndazvipedza,

kunenge kuri kutotanga;

paanenge aperera,

anenge asisatomboziva zvaari.

Munhu chiiwo zvake?

8Munhu chiiko? Anobatsirei?

Aneikowo chakanaka kana chakaipa?

9Upenyu hwomunhu

kana akasvitsa zana ramakore,

atowanda iwayo.

10Kuwanda kwakaita makore iwaya

kwakangoita sedonhwe romvura mugungwa

kana tsanga zvayo yejecha

kana tozvienzanisa nemisi isingaperi.

11Ndosaka Mwari achiita mwoyo murefu navanhu,

achivaitira tsiye nyoro dzakawanda.

12Anofanoona uye anotozviziva kuti

mugumo wacho mugumo wakaipa,

ndokusaka achinyanya kuvaitira tsitsi.

13Munhu anonzwira tsitsi

mumwe waanogarisana naye,

asi Mwari ane tsitsi nezvinhu zvose

anovatsiudza, achivadzikamisa nokuvadzidzisa,

anovadzosera kumusha somufudzi anodzosa hwai dzake.

14Anonzwira tsitsi vanhu vanoda kudzidziswa,

vane shungu dzokuziva mirao yake.

Mapiro akanaka

15Mwanangu, usati uku uri kuita zvakanaka,

uku uri kushora

kana kutaura mazwi anobaya

iwe uchipa chipo.

16Handiti dova idonhodzo here?

Saizvozvo izwi rakanaka kupfuura chipo.

17Chokwadi, handiti

izwi rinotopfuura chipo chakanaka here?

Asi munhu akanaka mwoyo

anazvo zvose zviri zviviri.

18Benzi harina mwoyo wakanaka asi kutuka chete,

rinotaura zvinorwadza mwoyo

uye chipo chomunhu anokonora

chinoita kuti munhu adonhe uso.

Funga nokuona zvamangwana

19Usati wataura tanga wadzidza;

usatiwo warwara, chengetedza utano hwako.

20Zvibvunzisise pachako, usati wagadzwa dare,

panguva yokushanyirwa

unozowana kuregererwa.

21Zvirereke iwe, usati warohwa nedenda

kana uchinge wavakuda kupara chitadzo, tendeuka.

22Usawane chinokutadzisa kuita

chaunenge watsidza kuita nokukurumidza.

Usamirire kusvikira wafa, usati wawadzana naMwari

kuti usunungurwe kuchitsidzo chako.

23Tanga wanyatsofunga, usati wapika mhiko,

usaite somunhu anoda kuedza Mwari.

24Funga nezvehasha dzake pazuva rokufa,

nenguva yokutsividza, paachazenge akufuratira.

25Pamazuva amaguta,

fungawo mazuva enzara;

pamazuvawo okupfuma,

usakanganwe mazuva ourombo noushayi.

26Kubvira mangwanani kusvikira mauro,

zvinhu zvinosanduka,

zvinhu zvose zvingakurumidze kupinduka pana Mwari.

27Mungwaru anogara akachenjerera zvose;

panguva inenge ichiparwa zvitadzo

mungwaru anozvichenjerera kuti arege kutadza.

28Munhu wose ane njere

anoziva chinonzi ungwaru,

uye anorumbidza anenge auwana.

29Vanhu vanonzwisisa tsumo,

vanova nyanzvi dzavanhu chaidzo

dzinodiranisa kutaura tsumo dzoungwaru.

Kuzvidzora

30Rega kuzviregerera uchitorwa mwoyo,

namapangiro ako

asi zvidzore iwe

kune twaunodokwairira.

31Kana ukazviregerera wonakirwa nezvisina maturo,

zvinozokuita kuti uve chiseko chavavengi vako.

32Usave anongofarira upenyu hwomutambaratede,

nokuti ungadaro ukazova murombo wokupedzesera.

33Usazviite rombe nokudyiririra

nezvaunotenga nemari yechikwereti,

iwe usina chaunacho muhomwe.