Ungwaru 13 - Shona Common Language Interconfessional Bible（SCLBD）

Kunamata nyenyedzi nezvinhu zvina masimba.

1Vanhu vose vakanga vasingazivi Mwari

vaiva noupenzi huri muropa.

Nezvinhu zvakanaka zvinoonekwa havana

kukwanisa kuziva iye aripo.

Vaiongorora mabasa akaitwa

asi havana kugona kuziva akaaita.

2Asi vaifunga kuti zvimwe moto,

kana kuti mhepo,

kana dutu remhepo,

kana kuti nyenyedzi dzina makwara adzo,

kana kuti nyanza ine simba guru rokuparadza,

kana kuti zvivheneko zvomudenga,

ndivo vamwari navatongi vapasi pose.

3Kana dai kuri kuti rufaro

runobva mukuyemura zvinhu izvi

ruri irwo rwakavapa kuti

vazviti vamwari, ngavazive

kuti Tenzi wazvo akanaka kuzvipfuura,

nokuti muridzi worunako ndiye akazvisika.

4Kana dai kuri kuti masimba

ezvinhu izvi namafambiro

azvo ari iwo akavakatyamadza,

ngavaone kwazviri kuti iye

akazviumba ane simba rakadii,

5nokuti paukuru norunako rwezvinhu zvakasikwa

unoona musiki wazvo wazvakatodzana naye.

6Kukanganisa kwavanhu ava hakusi kukuru,

zvichida vakarasika vachitsvaka Mwari,

vachida kuti vamuwane.

7Chikonzero chacho ndechokuti

kugara kwavanoita mukati mezvisikwa zvaMwari,

vanoramba vachitsvagurudza,

asi vakatorwa mwoyo nezvavanoona,

nokuti zvinhu zvinooneka zvakanaka.

8Uyezve kana ivava mhosva vanayo

9kana vakakwanisa kuziva zvakawanda kudai

zvokuti vaikwanisa kutsvagurudza vachiwana

ruzivo rwakadzama rwezvapasi pano,

ko, seiko vasina kukurumidza kuwana Tenzi wezvinhu izvi?

Kunamata zvifananidzo

10Vane nhamo vanovimba nezvinhu

zvisina upenyu vanotumidza kuti vamwari,

zvinhu zvakaitwa namaoko avanhu

zvinoti ndarama nesirivha, zvakanyatsoumbwa

kuita zvifananidzo zvemhuka,

kana nedombowo zvaro rakavezwa nevechinyakare.

11Ngatitii zvedu muvezi aona muti wakafanira, outema

onyatsoukwaturakwatura makwati, ouveza zvakanaka,

mudziyo une basa paupenyu hwamazuva ose.

12Asi marara okuveza kwaanga achiita anoabikisa

zvokudya zvinomugutisa.

13Zvino kune chidimbu chinenge chasara

mukati mawo chisina nebasa rose

chakamonyoroka chine zvifo zvakawanda.

Anochitora onyatsochiveza,

achivaraidza zvake nguva yake.

Anonyatsoveza noumhizha hwokunge achivarairwa zvake

achiita mufananidzo womunhu

14kana kuchitodzanisa nemhukawo zvayo isina maturo,

ndokuzochipenda nependi tsvuku,

sare zvino chati piriviri,

achivanza nependi pose panenge pakaipa.

15Zvino anochiitirawo kanenge kamba kachinokwana,

okaturika kumadziro achikasimbisa nechipikiri.

16Nokudaro ndiye anotoona kuti hachidonhere pasi,

sezvaanoziva kuti hapana chachinogona kuzviitira,

nokuti chinongova chifananidzo bedzi,

chinotoda kubatsirwa.

17Asi kana onamata nezvepfuma yake,

kana nezvemuchato wake, kana nezvevana vake,

haambonyari kutaurira chinhu chisina upenyu;

anokumbira simba kune chisina simba.

18Kana achida utano anokumbira kuchinhu chisina simba,

kana achida upenyu anonamata kuchinhu chakafa;

kana achida rubatsiro anorutsvaka

kuchinhu chisina kana ruzivo zvarwo,

kana oda rwendo runobudirira anokumbira kuchinhu

chisingakwanisi kana kusimudza tsoka.

19Kuti aite mari, kana basa, kana kubudirira

mubasa ramaoko ake anokumbira simba

kuchinhu chinamaoko asina simba.