Sira 7 - Shona Common Language Interconfessional Bible（SCLBD）

Mazano akasiyana–siyana

1Rega kuita zvakaipa, zvakaipa hazvizokuwirawo.

2Nzvenga zviito zvakaipa kuti zvizokunzvengawo.

3Mwanangu, usadyare mihomba yezvakaipa,

hauzokohwi zvakapetwa kanomwe.

4Usakumbire kupiwa ukuru naMwari,

kana kupiwa chigaro chapamusoro namambo.

5Rega kuzviita munhu akarurama

pamberi paMwari,

kana kuzviita mungwaru

pamberi pamambo.

6Usatsvage kuva mutongi wemhosva

ungadaro ukatadza kubvisa uipi,

ungadaro ukaita chizivano nomukurumukuru,

iwe uchizorasikirwa nounhu hwako.

7Rega kukanganisira vanhu,

kana iwewo kuzvifumura kuvanhu.

8Rega kudzokorora chitadzo chawakamboita

nokuti kunyange chitadzo chimwechete

uchatochirangirwa.

9Usafunge kuti Mwari achatarisa

kuwanda kwemipiro yangu,

uchizviti kana ndikapira mupiro

kuna Mwari Wokumusorosoro anoutambira.

10Rega kuora mwoyo pakunamata

kana kurega kupa vasina chavanacho.

11Rega kuseka munhu

ari kushungurudzika mwoyo

nokuti anosimudzira munhu pamusoro

ndiyewo mumwechete anodzikisira munhu pasi.

12Usarevere mumwe wako nhema

usadaro kana kushamwari.

13Ramba zvokureva nhema,

nokuti tsika yokureva nhema haina chimuko.

14Usataure twakawanda pakaungana vakuru

kana kuramba wongodzokorora–dzokorora

mazwi mukunamata.

15Usavenge mabasa anorema,

kana basa romumunda

rakasikwa naiye Wokumusorosoro.

16Rega kuzviverengera pakati pemhomho yavatadzi,

yeuka kuti hasha dzaMwari hadzitani kuuya.

17Zvidukupise zvakanyanya,

nokuti chirango chomunhu asina hanya

naMwari moto nehonye.

18Rega kutengesa shamwari pamusana pemari,

kana mukoma kana munun'una chaiye

pamusana pendarama yokuOfiri.

19Usarasikirwe nomudzimai kwaye ano ungwaru,

kunaka kwake mwoyo kwakakosha kupinda ndarama.

20Usabate nepfini muranda

anokubatira basa nomwoyo wose,

kana mushandi wamaricho anozvipira kukuitira basa.

21Ida muranda wako ane njere

sokuda kwaunozviita iwe pachako

usamunyime rusununguko rwake.

Vana

22Une zvipfuwo here?

Zvichengete, kana zvichikuraramisa,

zvichengetedze.

23Una vana here?

Varayire, vadzikamise vateerere

kubvira pauduku hwavo.

24Una vanasikana here?

Ita hanya nounhu hwavo

usaite zvokuseka navo.

25Kana waita kuti mwana wako aroorwe,

wapedza basa guru,

asi muroodze kumunhu anonzwisisa.

26Kana uino mukadzi anowirirana newe, usamurambe,

asi kana usingamude, usavimbe naye.

Vabereki

27Remekedza baba vako nomwoyo wako wose;

uye, usakanganwe kurwadziwa kwaamai vako

pavaikusununguka.

28Yeuka kuti vabereki vako ndivo vakaita kuti uberekwe

ko, ungavatende zvingaenzane nezvavakakuitira here?

Vapristi

29Itya Mwari, nomwoyo wako wose,

uremekedze vapristi vake.

30Ida Musiki wako nesimba rako rose,

urege kurasa vashandi vake.

31Itya Mwari, uremekedze mupristi

umupe mugove wake sezvawakatemerwa

zvinoti: michero yokutanga kuibva,

nomupiro wokupfupira zvitadzo,

namapandauko ezvibayiro,

nechibayiro chokuzvichenura

nemichero yokutanga yezvinhu zvinoera.

Kuva nehanya navanotambudzika

32Tambanudzirawo ruoko kumurombo,

kutira kuti uwane makomborero akazara.

33Iva nemwoyochena kuvapenyu vose,

usaregewo kuitira zvakanaka vakafa.

34Usashayikwe panhamo dzevamwe,

chemawo navanochema.

35Usazengurire kushanyira murwere.

Zviito zvakadai zvinoita kuti udiwe.

36Muna zvose zvaunoita, yeuka mugumo woupenyu hwako,

kana ukadaro hauzombotadzira Mwari.