Fitomaniana 4 - Malagasy Protestant Bible 2011

Izao no faranyalef א

1Indrisy!

Tonga matromatroka ny volamena;

niova ny volamena tsara!

Ny vato nohamasinina dia naely

eny an-joron-dalambe rehetra eny.

bet ב

2Ny zanaka sarobidin’i Ziona

izay nosandaina tahaka ny volamena tsy miharo

dia indrisy, efa atao toy ny siny tany,

asan’ny tanan’ny mpanefy tanimanga!

gimel ג

3Na ny amboahaolo aza dia manolotra nono

hampinonoany ny zanany;

fa ny oloko zanakavavy kosa dia tonga masiaka

toy ny aotirisy any an-tany efitra.

dalet ד

4Ny lelan’ny zaza minono

dia miraikitra amin’ny lanilaniny noho ny hetaheta;

ny ankizy madinika dia mangataka mofo,

nefa tsy misy mizara ho azy.

he ה

5Izay nihinana hanim-py

dia miala aina eny an-dalambe;

izay notezaina tamin’ny jaky

dia mamihina zezika.

vav ו

6Fa ny heloky ny oloko zanakavavy dia lehibe

noho ny helok’i Sodoma

izay noravana indray mipy maso monja,

nefa tsy nokasihin-tanana akory,

zaìn ז

7Ny Naziritany dia mangatsakatsaka noho ny fanala;

eny, fotsy noho ny ronono;

mena noho ny voahangy ny tenany,

ary tahaka ny vato safira ny endriny.

het ח

8Fa izao kosa dia mainty noho ny arina ny tarehiny

ka tsy misy mahafantatra azy eny an-dalana;

miraikitra amin’ny taolany ny hodiny

ka tonga maina toy ny hazo.

tet ט

9Tsara ny matin-tsabatra

noho ny maty mosary,

fa mihareraka toy ny voatrobaka ihany izy

noho ny tsy fisian’ny vokatry ny saha.

iod י

10Ny tanan’ny vehivavy malemy fanahy aza

dia nahandro ny zanany;

eny, izany no nohaniny

tamin’ny fandringanana ny oloko zanakavavy.

kaf כ

11Tanterahin’NY TOMPO ny fahavinirany

ka naidiny ny fahatezerany mirehitra;

nampirehitra afo tao Ziona Izy

handevonana ny fanorenany.

lamed ל

12Ny mpanjakan’ny tany sy ny mponina rehetra amin’izao tontolo izao

dia tsy nanampo

fa ny mpanohitra sy ny fahavalo no ho tafiditra

ao amin’ny vavahadin’i Jerosalema.

mem מ

13Noho ny fahotan’ny mpaminany

sy ny heloky ny mpisorony

izay nandatsaka ny ran’ny marina tao aminy

no nahatonga izao.

non נ

14Niraparapa toy ny jamba teny an-dalambe izy,

mihosin-dra rahateo ny tenany

ka tsy nisy sahy nikasika ny akanjony.

samek ס

15Ny olona dia niantsoantso azy hoe: Mialà ianareo fa maloto!

Mialà! Mialà! Aza mikasika anay!

Raha nandositra sy niraparapa izy dia hoy ny olona tany amin’ny hafa firenena:

Tsy mahazo mivahiny atỳ intsony ireny.

pe פ

16Ny tavan’NY TOMPO no nampihahakahaka azy,

ary tsy mijery azy intsony Izy;

ny mpisorona dia tsy hajain’ireny

ary ny antitra dia tsy amindrany fo.

aìn ע

17Mbola pahina ny masonay

miandry foana ny hamonjena anay;

nitazana teo amin’ny tilikambo fitazanana izahay

nanantena ny firenena izay tsy nahavonjy anay.

tsade צ

18Mitsongo dia anay izy

ka tsy mahazo mandeha izahay na dia eny an-dalambe aza;

akaiky ny fara fiainanay, tapitra ny andronay;

eny, tonga ny fara fiainanay.

kof ק

19Ny mpanenjika anay dia haingam-pandeha

noho ny voromahery eny amin’ny lanitra

ka milomay manenjika anay any an-tendrombohitra

ary manao vela-pandrika ho anay any an-tany efitra.

res ר

20Ny fofonainay, ilay voahosotry NY TOMPO,

dia efa voafandriky ny longoany,

dia ilay nataonay hoe:

Ao ambanin’ny alokalony no hahavelona anay any amin’ny hafa firenena.

sin ש

21Mifalia sy miravoravoa ihany, ry Edoma zanakavavy

izay monina any amin’ny tany Oza;

ianao koa no horosoana ny kapoaka

ka ho mamo sy hitanjaka.

tao ת

22Tsy misy intsony ny helokao,

ry Ziona zanakavavy,

tsy hoentina ho babo intsony ianao;

hamaly anao noho ny helokao Izy, ry Edoma zanakavavy,

ka hampiseho ny fahotanao.