Salamo 52 - Malagasy Protestant Bible 2011

Ny loza hanjo izay mitoky amin’ny harenaHo an’ny mpiventy hira. Maskila nataon’i Davida, fony tonga i Doega edomita ka nilaza tamin’i Saoly hoe: Tonga ao an-tranon’i Ahimeleka i Davida.

1Nahoana no mandoka tena amin’ny fanaovan-dratsy ianao, ry ilay mahery?

Ny famindrampon’Andriamanitra dia maharitra amin’ny andro rehetra.

2Loza no foronin’ny lelanao

tahaka ny hareza maranitra, ry mpanao fitaka!

3Tia ny ratsy noho ny tsara ianao

ary ny lainga noho ny miteny ny marina. Fiatoana.

4Ny teny mandripaka rehetra no tianao, ry lela mamitaka.

5Andriamanitra kosa hanongana anao mandrakizay;

hisambotra anao sy hanongotra anao hiala ao an-day Izy

ary hamongotra anao tsy ho eo amin’ny tanin’ny velona. Fiatoana.

6Hijery ny marina dia hatahotra

ka hihomehy azy hoe:

7Indro ny lehilahy izay tsy nanao an’Andriamanitra ho heriny

fa natoky ny haben’ny harenany ka nikikitra tamin’ny faharatsiany.

8Fa izaho dia tahaka ny hazo oliva maitso ao amin’ny tranon’Andriamanitra.

Matoky ny famindrampon’Andriamanitra mandrakizay doria aho.

9Hidera Anao mandrakizay aho satria Ianao no nanao izany,

ary hanantena ny anaranao aho, eo anatrehan’ny olonao masina, satria tsara Ianao.