Salamo 149 - Malagasy Protestant Bible 2011

Mankasitraka ny olony NY TOMPO

1 Haleloia.

Mihirà fihiram-baovao ho an’NY TOMPO;

manaova hira fiderana Azy eo amin’ny fiangonan’ny olona masina.

2Aoka hifaly amin’ny Mpanao azy ny Israely;

aoka hiravoravo amin’ny Mpanjakany ny zanak’i Ziona.

3Aoka hidera ny anarany amin’ny dihy izy

ary hankalaza Azy amin’ny ampongatapaka sy ny lokanga.

4Fa sitraky NY TOMPO ny olony,

ravahany famonjena ny mpandefitra.

5Aoka hiravoravo amin’ny voninahitra ny olona masina;

aoka hihoby tsara eo am-pandrianany izy.

6Aoka hisy fanandratana an’Andriamanitra eo am-bavany

ary sabatra roa lela eny an-tanany,

7hamaliany ny Jentilisa

sy hamaizany ny firenena maro,

8hamatorany ireo mpanjakany amin’ny gadra,

sy ny olo-malazany amin’ny gadra vy,

9mba hanaovany ny fitsarana voasoratra:

voninahitry ny olony masina rehetra izany.

Haleloia.