Mapisarema 140 - Original Shona Union Bible 1949 (Doke Orthography)（SUB1949）

Davidi unonyeŋgetera kuti arwirwe paʋaʋeŋgi ʋake.Kumutuŋgamiriri wokuimba. Pisarema raDavidi.

1Ndirwirei Jehova, pamunhu wakaipa;

Ndiceŋgetei pamunhu unehasha;

2Iʋo, ʋanofuŋga ɀakaipa mumŋoyo yaʋo;

Ʋanogara ʋacimutsa kurwa.

3Ʋakarodza rurimi rwaʋo senyoka;

Ʋuturu bgeciʋa ʋuri pasi pemiromo yaʋo.

4Ndiceŋgetei, Jehova, pamaʋoko owakaipa;

Ndiceŋgetei pamunhu unomanikidza;

Ʋanofuŋga mano okugumbusa tsoka dzaŋgu.

5Ʋanoɀikudza ʋakandiʋanzira musuŋgo namaɓote;

Ʋakadzika mumbure parutiʋi rwenzira:

Ʋakanditeyera rugombe.

6Ndakati kunaJehova: Ndimi Mŋari waŋgu;

Tererai, Jehova, munzwe inzwi rokukumbira kwaŋgu.

7Mŋari Ishe, ndimi simba rokuponeswa kwaŋgu,

Makafukidza musoro waŋgu pazuʋa rokurwa.

8Jehova, regai kupa wakaipa ɀaanotȿaka;

Musapfuʋudza zano rake rakaipa; kuti ʋarege kuɀikudza.

9Kana uri musoro waʋanondikomba,

Ɀakashata ɀemiromo yaʋo imene ŋgaɀiʋafukidze.

10Mazimbe omŋoto, anopfuta, ŋgaawire pamsoro paʋo;

Ŋgaʋakandirwe mumŋoto;

Nomumakomba akadzika, kuti ʋarege kumuka ɀe.

11Munhu, unamakuhwa, haaŋgasimbiswi pasi;

Ɀakaipa ɀicavima munhu unomanikidza kuti ɀimuparadze.

12Ndinoziʋa kuti Jehova ucagadzira mhoȿa yaʋanotambudzika,

Nokururamisira ʋashaiwi.

13Ɀirokwaɀo, ʋakarurama ʋacaʋoŋga zita renyu;

Ʋanemŋoyo yakarurama ʋacagara pamberi penyu.