I CRONICAS 12 - Ilokano Form-Based Bible: Ti Biblia (1973)

Dagiti gagayyem ni David idiay Siclag. Dagiti Gaditas simmurotda ken David. Dagiti sabsabali a gagayyemna. Dagidiay a nangtulong ken David tapno agbalin nga ari.

1Dagitoy isuda dagiti immay ken David 1 Sam. 27:1-6.idiay Siclag, iti bayat ti panaglemmengna pay laeng a gapu ken ni Saul nga anac ni Kis; ket isuda addada idi cadagiti mamaingel a lallaki, a catulonganna iti gubat.

2Isuda naigamanda cadagiti ba-i, ket nabalinda nga aramaten ti ima a canawan ken catigid nga agpadpada iti panagipalatibong cadagiti batbato ken iti panag-biat cadagiti batbato ken iti panagibiat cadagiti panpana iti ba-i: isuda nagtaudda cadagiti cacabsat ni Saul iti Benjamin.

3Ti pangolo isu idi ni Ahiezer: sa ni Joas nga anac a lalaki ni Semaa a Gabaatita, ken ni Jeziel, ken ni Pelet, nga annac a lalaki ni Azmabeth, ken ni Beraca, ken ni Jehu nga Anatotita,

4Ken ni Ismaias a Gabaonita, a maysa a maingel a lalaki cadagiti tallopulo, ken ngatoen dagiti tallopulo, ken ni Jeremias, ken ni Jahaziel, ken Johanan, ken Jozabad a Gederatita,

5Ni Eluzai, ni Jerimot, ken ni Bealias, ni Semarias, ken ni Sefatias nga Harufita,

6Ni Elcana, ni Isias, ken ni Azareel, ni Joezer, ken ni Jasobam, a Coratitas,

7Ken ni Joela, ni Zebadias, nga annac a lallaki ni Jeroham a taga Gedor.

8Ket cadagiti Gaditas simminada a napan ken David idiay sarikedked idiay let-ang, dagiti lallaki a mannacabalin ken mamaingel, lallaki a nasursuroan a maipaay iti gubat, a nabalinda ti nagtagicalasag ken nagtagipica, a dagiti rupada casda la cadagiti rupa dagiti leon, ken nasiglatda a casda la cadagiti kigaw iti rabaw dagiti banbantay:

9Ni Eser ti pangolo, ni Abadias ti maicadua, ni Eliab ti maicatlo,

10Ni Mismana ti maicapat, ni Jeremias ti maicalima,

11Ni Attai ti maicanem, ni Eliel ti maicapito,

12Ni Johanan ti maicawalo, ni Elzabad ti maicasiam,

13Ni Jeremias ti maicasangapulo, ni Macbani ti maicasangapulo ket maysa.

14Dagitoy cadagiti annac a lallaki ni Gad isuda idi dagiti capcapitan ti buyot: ti cabassitan idi pumada iti sangagasut, ket ti cadackelan iti sangaribu.

15Dagitoy dagiti bimmallasiw iti Jordan iti umuna a bulan, idi naglupias cadagiti isu-amin a ngarngarabna; ket pinagtalawda amin dagiti taga loblobong, iti agpadaya ken iti agpalaud nga agpadpada.

16Ket cadagiti annac da Benjamin ken Juda immayda iti sarikedked ken David.

17Ket ni David rimmuar a simmabet cadacuada, ket simmungbat ket kinunana cadacuada, No umaycayo a sicacappia caniac tapno tulongandac, ti pusoc maitiponto cadacayo; ngem no umaycayo a mangyawat caniac cadagiti cabusorco, idinto ta awan ti biddut cadagiti imac, ti Dios dagiti ammatayo isu imatanganna ken babalawenna.

18Idin ti Espiritu immapay ken 2 Sam. 17:25.Amasai, a pangolo idi dagiti tallopulo, ket kinunana, Cucuanacami, David, ken cadduanacami, sica anac a lalaki ni Jesse; talna, talna ti adda kenca, ken talna ti adda cadagiti catcatulongam; ta ti Diosmo tulongannaca. Idi a casta inawat ida ni David, ket inaramidna ida a capcapitan ti bunggoy.

19Naggapu iti Manases nagtinnag met ti dadduma ken David, 1 Sam. 29:2-9.idi isu immay a kimmuyog cadagiti Filisteos a maibusor ken Saul iti gubat: ngem isuda dida tinulongan ida; ta iti patigmaan dagiti appo dagiti Filisteos isu pinagawidda, a kinunada, Agtinnagto ken apona a Saul iti panagpeggad dagiti ol-olotayo.

20Idi a mapmapan idiay Siclag, nagtinnag kencuana ti naggapu iti Manases, da Adnas, Jozabad, ken Jediael, ken Micael, Jozabad, Eliu, ken Silletai, a capcapitan dagiti rinibribu a naggapuda iti Manases.

21Ket isuda tinulonganda ni David a maibusor iti bunggoy 1 Sam. 30:1-10.dagiti agbariw-as: ta isuda amin lallakida a mannacabalin ken mamaingel, ken capcapitanda idi iti buyot.

22Ta inaldawaldaw idi nga umay ken David dagiti lallaki tapno tulonganda, agingga iti adda idi maysa a dackel a buyot, a cas iti buyot ti Dios.

23Ket dagitoy dagiti bilang dagiti pangoloen dagiti naigaman a maipaay iti gubat, nga 2 Sam. 2:3-4; 5:1.immay ken David idiay Hebron, a naglisi iti pagarian ni Saul a mayannurot iti sao ni Jehova.

24Dagiti annac ni Juda a nagtagicalasag ken nagtagipica innem a ribu ket walogasutda, a naigaman a maipaay iti gubat.

25Cadagiti annac ni Simeon, lallaki a mannacabalin ken mamaingel a maipaay iti gubat, pito a ribu ket sangagasutda.

26Cadagiti annac ni Levi uppat a ribu ket innem a gasutda.

27Ken ni Joiada a mangidalan idi iti balay ni Aaron; ket kencuana adda idi tallo a ribu ket pito a gasut,

28Ken ni Sadoc, a maysa a lalaki nga agtutubo a mannacabalin ken maingel, ken iti balay ni amana duapuloda ket dua a capcapitan.

29Ket cadagiti annac ni Benjamin, a cacabsat ni Saul, tallo a ribuda: ta agingga idi ti caaduan sinalimetmetanda ti rebbengda iti balay ni Saul.

30Ket cadagiti annac ni Efraim duapulo a ribuda ket walo a gasut, lallaki a mannacabalin ken mamaingel, lallaki nga agdindinamag cadagiti balbalay dagiti ammada.

31Ket iti caguddua ti caputotan ni Manases sangapuloda ket walo a ribu, a nainaganan, tapno umayda ken pagarienda ni David.

32Ket cadagiti annac ni Issacar, lallaki a mannacaawat cadagiti tiempo, tapno ammoenda no ania ti rebbeng nga aramiden ti Israel, dagiti pangoloen dagidiay duagasutda idi; ket amin a cacabsatda addada idi cadagiti panagbilinda.

33Iti Zabulon, a macabael a rumuar iti buyot, a nacabalin a mangornos iti gubat, iti amin a kita ti gamigam ti gubat, limapulo a ribuda, ken dagiti nacabalin a nangornos iti gubat, ket saanda idi a nagrutap a puso.

34Ket iti Neftali sangaribu a capcapitan, ket caduada dagiti sicacalasag ken sipipica a tallopulo ket pito a ribu.

35Ket cadagiti Danitas a nacabalin a mangornos iti gubat, duapulo ket walo a ribuda ket innem a gasut.

36Ket iti Aser, a macabael idi a rumuar iti buyot, a nacabalin a mangornos iti gubat, uppat a pulo a ribu.

37Ket iti sabali a bangir ti Jordan, cadagiti Rubenitas, ken cadagiti Gaditas, ken iti guddua ti caputotan ni Manases, a siigamda iti amin a kita ti igam ti gubat a maipaay iti bacal, sangagasut ket duapulo a ribuda.

38Amin dagitoy, idinto a lallaki ti gubat, a nabalinda nga ornosen ti bacal, immayda a binuyog ti napalongdo a puso idiay Hebron, tapno pagarienda ni David iti isu-amin nga Israel: ket amin a matda ti Israel sangsangcanakemda a mamagari ken David.

39Ket isuda nakiaddada idiay ken David bayat iti tallo nga aldaw, a nangnangan ken immininum; ta dagiti cacabsatda nagsaganada iti maipaay cadacuada.

40Maysa pay dagiti asideg idi cadacuada, agingga met laeng iti Issacar ken iti Zabulon, ken iti Neftali, nangyegda iti tinapay nga inawit dagiti as-asno ken dagiti camcamello, ken dagiti mulmulo, ken dagiti vacvaca, balbalon a macan, cancancanen nga higos, ken raraay dagiti pinakebbet nga uvuvas, ken arac, ken lana, ken vacvaca, ken carcarnero a nawadwad: ta adda idi rag-o iti Israel.