Spreuke 16 - Die Bybel 2020-vertaling

1 'n Mens kry sy gedagtes agtermekaar,

maar die antwoord van die tong

kom van die Here.

2 Al die weë van 'n mens

is onbesproke in sy eie oë,

maar die een wat die geeste toets,

is die Here.

3 Vertrou wat jy doen

aan die Here toe,

dan sal jou planne standhou.

4 Die Here het sy doel met alles;

selfs 'n goddelose bestaan

vir die dag van onheil.

5 Afstootlik vir die Here is elkeen

met 'n hoogmoedige hart;

dit staan vas:

So iemand sal nie ongestraf bly nie.

6 Deur troue liefde en waarheid

word sondeskuld bedek,

en deur ontsag vir die Here

vermy 'n mens die kwaad.

7 Wanneer die Here tevrede is

met 'n mens se lewenspaaie,

laat Hy selfs sy vyande

met hom vrede maak.

8 'n Bietjie, saam met geregtigheid,

is beter as 'n groot inkomste

verkry deur onreg.

9 Die hart van 'n mens beplan sy pad,

maar die Here bepaal sy voetstappe.

10 'n Orakelspreuk is op die lippe

van 'n koning;

by 'n vonnis mag sy mond

nie ontrou wees nie.

11 'n Skaal, 'n betroubare weegskaal,

is van die Here;

al die gewigte in die sak

is sy handewerk.

12 Afstootlik vir konings

is die pleeg van 'n goddelose daad,

want deur geregtigheid

staan 'n troon vas.

13 Regverdige lippe

stel konings tevrede,

en hulle het die een lief

wat die regte dinge sê.

14 Die woede van 'n koning

is 'n boodskapper van die dood,

maar 'n wyse mens

bring dit tot bedaring.

15In die stralende gesig

van 'n koning is daar lewe,

en sy goedkeuring is soos die wolke

van laatreëns.

16 Die verkryging van wysheid –

hoeveel beter is dit nie as goud nie!

Die verkryging van insig

is verkieslik bo silwer.

17 Die gebaande weg van opregtes

is om weg te draai van die kwaad;

wie sy lewe wil beskerm,

gee ag op sy lewenspad.

18 Voor ineenstorting is daar trots,

en voor die val is daar

'n hooghartige gees.

19'n Nederige gees

saam met magteloses

is beter as om buit te verdeel

saam met hovaardiges.

20 Wie hom toespits op 'n saak,

sal sukses behaal,

en wie op die Here vertrou,

is gelukkig.

21 Wie wys van hart is,

word verstandig genoem,

en soetheid van lippe

bevorder onderrig.

22 Begrip is 'n bron van lewe

vir die besitters daarvan,

maar die vermaning van sotte

is sotheid.

23 Die hart van 'n wyse

maak sy mond verstandig

en bevorder die onderrig op sy lippe.

24Vriendelike woorde

is 'n heuningkoek wat oorloop –

soet vir die keel en helend

vir die gebeente.

25 Daar is 'n pad wat vir 'n mens

reg lyk,

maar dit eindig by paaie na die dood.

26 Die eetlus van 'n werker

laat hom hard werk;

ja, sy mond spoor hom aan.

27 'n Deugniet grawe onheil uit,

en op sy lippe is dit

soos 'n versengende vuur.

28'n Verdorwe mens ontketen stryd,

en 'n kwaadstoker

skei boesemvriende.

29'n Man van geweld

verlei sy medemens,

en laat hom 'n pad loop

wat nie goed is nie.

30Wie sy oë toeknyp,

is besig om verdorwe dinge

te beplan;

wie sy lippe saampers,

het die kwaad reeds gedoen.

31 'n Sierlike kroon is grysheid;

op die pad van geregtigheid

word dit gevind.

32 'n Geduldige mens

is beter as 'n held,

en wie sy gees beheers,

is beter as iemand

wat 'n stad inneem.

33 Die lot word gewerp

in die vou van die kleed,

maar elke beslissing daarvan

kom van die Here.