Job 16 - Die Bybel 2020-vertaling

Job se antwoord op Elifas se tweede betoog

1Job het hierop gereageer en gesê:

2“Ek het al baie sulke woorde gehoor!

Almal van julle is treurige troosters!

3 Is dit nou die einde

van jou woorde van wind?

Of wat dryf jou dat jy bly antwoord?

4Ook ek sou soos julle kon praat

as julle in my plek was.

Ek sou woorde aanmekaar kon ryg teen julle,

my kop oor julle meewarig skud.

5Ek sou julle met die woorde

van my mond kon versterk;

die meegevoel van my lippe

sou verligting bring.

6As ek praat, bedaar my pyn nie.

En as ek ophou –

sou dit my dan verlaat?

7“Maar nou – God het my uitgeput.

U het almal in my omgewing

met vrees vervul.

8 U het my vasgegryp –

dit dien as getuienis;

die leuen oor my staan teen my op,

dit getuig openlik teen my.

9Sy toorn het my verskeur,

my as 'n vyand behandel.

Teen my het Hy op sy tande gekners;

my teenstander het my

met sy oë deurpriem.

10 Hulle het hulle monde

wyd teen my oopgesper,

my beledigend op die wange geslaan;

hulle span teen my saam.

11God lewer my oor

aan misdadigers,

in die hande van goddeloses

werp Hy my.

12Ek was sorgeloos,

maar Hy het my rondgeruk,

my aan die nek gegryp

en aan stukke gebreek.

Hy het my as 'n teiken vir Hom opgestel;

13 sy pyle vlieg rondom my,

sonder genade deurboor Hy my niere,

Hy stort my gal op die grond uit.

14Hy slaan bres ná bres in my;

soos 'n held storm Hy op my af.

15“'n Roukleed het ek bo-oor

my naakte vel vasgewerk,

ek het my krag in die stof laat sink.

16My gesig is rooi van die gehuil;

en daar is donker skaduwees om my oë –

17 al kleef daar geen geweld

aan my handpalms nie,

en al is my gebed suiwer.

18Grond, moenie my bloed bedek nie,

laat daar geen rusplek

vir my hulpgeroep wees nie.

19 Maar nou, kyk, my getuie is in die hemel,

my pleitbesorger is in die hoogte;

20die een wat vir my

voorspraak maak, is my vriend.

By God stort my oog trane;

21maar die voorspraak

sal vir 'n man by God pleit

soos 'n mens vir sy vriend pleit.

22 Want min jare sal verloop

voordat ek op 'n pad gaan

waarmee ek nie sal terugkeer nie.