Psalms 94 - Die Bybel 2020-vertaling

1 O God wat vergeld, Here,

God wat vergeld, laat u lig skyn.

2Verhef U, regter van die aarde,

gee hoogmoediges

hulle verdiende loon.

3Hoe lank sal goddeloses, o Here,

hoe lank sal goddeloses jubel?

4Hulle laat woorde

onbeskaamd uitborrel;

almal wat onreg pleeg,

prys hulleself aan.

5Hulle verpletter u volk, Here,

hulle verdruk u erfdeel.

6Hulle maak weduwees

en •vreemdelinge dood,

hulle vermoor vaderlose kinders.

7Dan sê hulle nog:

“Die Here sien dit nie,

die God van Jakob merk dit nie op nie.”

8Sien dit tog in, julle

onverstandiges onder die volk!

En dwase, wanneer word julle wys?

9Hy wat die oor inplant,

sal Hy nie kan hoor nie,

of Hy wat die oog vorm,

sal Hy nie kan sien nie?

10Hy wat nasies vermaan,

sal Hy nie straf nie,

Hy wat aan mense kennis oordra?

11 Die Here ken mense se gedagtes,

dat dit nietigheid is.

12Gelukkig is die mens

vir wie U teregwys, Here,

vir wie U leer uit u wet,

13om aan hom verligting te gee

in dae van onheil,

totdat 'n graf gegrawe is

vir goddeloses.

14Ja, die Here sal sy volk

nie in die steek laat nie;

sy erfdeel sal Hy nie laat vaar nie.

15Want die regspraak sal weer

regverdig wees

en almal met opregte harte sal dit steun.

16Wie sal vir my opstaan

teen kwaaddoeners?

Wie sal vir my in die bres tree

teen hulle wat onreg pleeg?

17As die Here nie my hulp was nie,

sou ek spoedig in die stilte

gewoon het.

18As ek dink my voet gaan swik,

dan ondersteun

u troue liefde my, Here.

19 Wanneer ontstellende gedagtes

meer word in my binneste,

dan beur u vertroosting my op.

20Kan die setel van vernietiging

wat die wet skade aandoen,

aan U verbonde wees?

21Hulle span saam teen die lewe

van regverdiges,

hulle verklaar onskuldige bloed skuldig.

22Maar die Here het vir my

'n toevlugsoord geword,

my God het my rotsskuiling geword.

23En Hy sal hulle onreg na hulle

laat terugkeer,

met hulle eie kwaad sal Hy hulle

vernietig;

die Here ons God sal hulle vernietig.