Psalms 10 - Die Bybel 2020-vertaling

ל LAMED

1Waarom, Here, bly U so ver staan,

waarom verberg U Uself

in tye van nood?

2In hulle hoogmoed agtervolg

goddeloses die magtelose.

Mag hulle verstrik raak

in die sameswerings

wat hulle beplan!

3Ja, 'n goddelose spog

oor sy hartsbegeertes,

en terwyl hy wins maak,

vervloek en verag hy die Here.

4Die goddelose sê

met sy neus in die lug:

“God vra nie rekenskap nie;

daar is geen God nie” –

dit is al sy gedagtes.

5Sy paaie is altyd voorspoedig.

U beslissings is ver buite sy gesigsveld.

Hy minag al sy teenstanders.

6Hy sê in sy hart:

“Ek sal nie struikel nie;

van geslag tot geslag is ek die een

wat nie teenspoed sal ervaar nie.”

פ PE

7 Sy mond is vol vervloeking,

bedrog en verdrukking;

onder sy tong is gemeenheid en onreg.

8Naby dorpies lê hy in 'n hinderlaag;

in skuilplekke vermoor hy

die onskuldige;

sy oë is op die loer vir die weerlose.

ע AJIN

9In 'n skuilplek lê hy

soos 'n leeu in die ruigte;

hy lê die magtelose voor

om hom te vang;

hy vang die magtelose

deur sy vangnet toe te trek.

10 Verpletter krimp die weerlose ineen;

hy val in sy mag.

11Die goddelose sê in sy hart:

“God vergeet.

Hy hou sy oë toe;

Hy sien dit nooit raak nie.”

ק KOF

12Staan op, Here;

God, lig u hand;

vergeet die magteloses tog nie!

13Waarom verag 'n goddelose mens God?

Hy sê in sy hart

U eis nie rekenskap nie.

ר RESJ

14U sien tog self die moeite en verdriet,

U sien dit raak.

Deur dit in u hand te gee,

laat weerloses dit aan U oor;

vir weeskinders is U 'n helper.

שׁ SJIN

15Breek die arm van die goddelose,

ja, eis rekenskap van 'n bose mens

oor sy goddeloosheid

totdat U niks meer vind nie.

16Die Here is Koning vir altyd en ewig;

nasies verdwyn uit sy land.

ת TAW

17U het gehoor wat die verdruktes

graag wil hê, Here.

U versterk hulle harte,

U oor luister aandagtig

18om aan die weeskind

en die onderdrukte

reg te laat geskied.

Niemand sal meer voortgaan

om mense uit die land te verdryf nie.