Siraku 49 - Interconfessional Albanian Bible – 2020 (with DC)（AL1）

1Kujtimi i Josisë temjan i përzier,

përgatitur me zejen e barnatorit,

i ëmbël si mjaltë në çdo gojë,

si muzika në një gosti vere.

2Ai i dha drejtim kthimit të popullit,

zhduku ndyrësitë e paudhësisë.

3E drejtoi zemrën drejt Zotit,

vendosi shpirtin besimtar në kohën e paudhësisë.

4Përveç Davidit, Ezekisë e Josisë,

të gjithë bënë shkelje,

se braktisën ligjin e të Tejlartit

e morën fund mbretërit e Judës.

5Ua dhanë të tjerëve fuqinë,

kombeve të huaja lavdinë.

6I vunë flakën qytetit të zgjedhur për shenjtërore,

ia shkretuan rrugët,

7siç thotë Jeremia, të cilit i bënë keq,

ndonëse ishte shenjtëruar profet që në bark të nënës,

për të zhbirë, për të rrënuar e shkatërruar,

por edhe për të ndërtuar e për të mbjellë.

8Vegimin e lavdisë e pa Ezekieli,

ia dëftoi Zoti mbi karrocën e kerubëve.

9U kujtua për armiqtë në stuhi,

u bëri mirë atyre që ishin në rrugë të drejtë.

10Eshtrat e dymbëdhjetë profetëve

u përtëritshin atje ku prehen!

E ngushëlluan popullin e Jakobit,

e çliruan me besim shpresëplotë.

11Si ta madhërojmë Zorobabelin?

Ishte si vulë në dorën e djathtë.

12Po Jozuehun, birin e Jocadakut?

Në kohën e tyre e ndërtuan shtëpinë,

i ngritën tempull shenjtërisë së Zotit,

e përgatitën për lavdinë e të amshuarit.

13Edhe kujtimi i Nehemisë do të ruhet gjatë,

ai ngriti muret tona të rëna,

u vuri dyer e shula,

na ringriti shtëpitë.

14Askush s'është krijuar mbi tokë si Enoku,

prandaj u mor nga toka.

15S'u lind asnjeri si Jozefi,

prijësi i vëllezërve, mbështetja e popullit.

Eshtrat e tij u ruajtën.

16Semi e Seti qenë të lavdishëm ndër njerëz,

por Adami ua kalon tërë të gjallëve të krijuar.