Siraku 13 - Interconfessional Albanian Bible – 2020 (with DC)（AL1）

Shoqëritë

1Kush prek ziftin, ndotet,

kush shoqërohet me krenarin, bëhet si ai.

2Mos ngri pesha që s'i mban dot,

mos rri me njerëz më të fortë e më të pasur se ti.

Si mund të shoqërohet poçja me kusinë?

Kusia e godet e poçja thyhet.

3I pasuri bën padrejtësi e hakërrehet.

Të varfrit i bëhet padrejtësi

e i duhet të kërkojë falje.

4Kur i duhesh, i pasuri të përdor,

në nevojë, të braktis.

5Po të kesh, jeton me ty,

të zhvat pa keqardhje.

6Kur ta ka nevojën, të mashtron,

të buzëqesh e të mban me shpresa,

të flet ëmbël e të pyet:

«Për çfarë ke nevojë?».

7Të fton në gosti e pastaj të turpëron,

mandej të zhvat dyfish a trefish

e në fund tallet me ty.

Kur të sheh më pas, të shmang

e shkon duke tundur kokën.

8Kujdes se mos mashtrohesh

e poshtërohesh nga mendjelehtësia.

9Kur të fton një i pushtetshëm, shmangu,

se pastaj të fton prapë.

10Mos u turr, se të kthejnë pas,

mos rri larg, se të harrojnë.

11Mos i fol si i barabartë,

mos ia beso fjalët e shumta,

se me fjalë të shumta të vë në provë

e të heton buzagaz.

12Kush nuk mban gojën është i pamëshirshëm,

nuk t'i kursen as ndëshkimet, as burgun.

13Ruhu e bëj kujdes,

sepse po ecën drejt rrënimit.

14[Kur të dëgjosh këto fjalë në gjumë, zgjohu,

duaje Zotin për gjithë jetën

dhe atij kërkoi ndihmë për shpëtim.]

15Çdo kafshë e do llojin e vet

e çdo njeri të afërtin e tij.

16Çdo gjallesë çiftohet me llojin e vet,

njeriu bashkohet me njeriun.

17Çfarë ka të përbashkët ujku me qengjin?

Kështu edhe mëkatari me besimtarin.

18Si mund ta lërë në paqe hiena qenin?

Si mund ta lërë në paqe i pasuri të varfrin?

19Gomari i egër është preja e luanit,

të varfrit haja e të pasurve.

20Përulësia është neveri për krenarin,

i varfri neveri për të pasurin.

21Kur i pasuri lëkundet, e mbështetin miqtë,

kur i varfri bie, edhe miqtë i japin të shtyrën.

22Kur i pasuri gabon, shumë vetë e ndihmojnë,

flet marrëzira, por e shfajësojnë.

Kur i varfri gabon, e shajnë,

flet me mençuri, por nuk i japin rëndësi.

23Flet i pasuri e të gjithë heshtin,

ia ngrenë fjalën gjer në re.

Flet i varfri e thonë: «Kush është ky?».

Po të pengohet i japin teposhtën.

24Pasuria është e mirë kur nuk është mëkat,

vetëm për të pafetë varfëria është e keqe.

25Zemra ia ndryshon njeriut pamjen,

për mirë a për keq.

26Zemra e mirë shihet te fytyra e qeshur,

duhet ta lodhësh mendjen për të gjetur shëmbëlltyra.