Siraku 25 - Interconfessional Albanian Bible – 2020 (with DC)（AL1）

Fjalë të mençura

1Tri gjëra më pëlqejnë e janë të këndshme

para Zotit e para njerëzve:

mirëkuptimi me vëllezërit,

miqësia me të afërtit,

burri e gruaja që puqen.

2Tri dukuri i urrej me shpirt,

se më ngacmon fort jeta e tyre:

varfanjaku mburravec, pasunari gënjeshtar,

plaku kurvar i rrjedhur nga mendja.

3Po nuk mblodhe në rini,

si mund të gjesh në pleqëri?

4Sa hije i ka të thinjurit gjykimi

e plakut njohuria e këshilla!

5Sa e këndshme është urtia e të moshuarve,

mendimi dhe këshilla e të nderuarve!

6Kurora e të moshuarve është përvoja e madhe,

mburrja e tyre është droja e Zotit.

7Mendoj se nëntë gjëra e lumturojnë zemrën,

por një të dhjetë e kam në majë të gjuhës:

njeriu që u gëzohet fëmijëve

dhe sheh rënien e armikut sa është gjallë.

8Lum kush ndan shtëpinë me gruan e mençur,

kush nuk gabon me gjuhë

e nuk i nënshtrohet më të ultit.

9Lum kush gjen mençurinë

dhe i flet veshit që dëgjon.

10Sa i madh kush gjen urtinë!

Por s'ka mbi atë që druan Zotin.

11Droja e Zotit tejkalon gjithçka,

kush matet me atë që e ka?

12[Dashuria për Zotin fillon me drojën e tij,

lidhja me të nis përmes besimit.]

13Çdo plagë, por jo plagën e zemrës!

Çdo ligësi, por jo ligësinë e gruas!

14Çdo pikëllim, por jo pikëllimin prej urryesve!

Çdo hakmarrje, por jo hakmarrjen e armiqve!

15S'ka kokë si koka e gjarprit,

s'ka zemërim si zemërimi i armikut.

Ligësia e gruas

16E ndaj shtëpinë me luan e dragua

më mirë se me të ligën grua.

17Ligësia ia ndryshon pamjen gruas,

ia nxin fytyrën si ariut.

18Burri i saj ia mësyn sofrës së të tjerëve

e ofshan hidhur pa dashje.

19Çdo ligësi është e vogël para ligësisë së gruas,

asaj i rëntë shorti i mëkatarit!

20Si e përpjetë rëre për këmbët e plakut

është gruaja gojëzgjidhur për një burrë të heshtur.

21Mos u kalamend nga bukuria e gruas

e mos të të zërë epshi i gruas.

22Zemëratë, marre e turp i madh

nëse gruaja mban burrin.

23Zemrën e flashkët, fytyrën e vrenjtur

e lëngatën e zemrës i sjell gruaja e ligë.

Duar të mekura e gjunjë të këputur

vijnë prej asaj që nuk e gëzon burrin.

24Te gruaja zë fill mëkati,

prej saj vdesim të gjithë.

25Ujit mos i hap udhën

e gruas së ligë gojën.

26Nëse nuk të mban krah,

ndaje nga vetja.