Siraku 28 - Interconfessional Albanian Bible – 2020 (with DC)（AL1）

1Kush hakmerret, gjen hakmarrjen e Zotit,

se ai ia mban parasysh mëkatet.

2Falja shkeljen të afërtit

e, kur të lutesh, do të të falen mëkatet.

3Njeriu i zemëruar me njeriun,

a mund të kërkojë shërim nga Zoti?

4Kush nuk ka mëshirë për të ngjashmin,

a mund të lutet për mëkatet e veta?

5Kur njeriu i dobët mban mëri,

kush ndërhyn për mëkatet e tij?

6Kujto fundin e jetës e jepi fund armiqësisë,

kujto kalbjen e vdekjen e mbaj urdhërimet.

7Kujto urdhërimet e mos i mbaj mëri të afërtit,

kujto besëlidhjen e të Tejlartit e shpërfilli mëkatet.

8Rri larg zënkave e të zvogëlohen mëkatet,

se njeriu idhnak ndez zënkën,

9mëkatari trazon miqtë

e mes paqësorëve mbjell përçarje.

10Zjarri djeg sa ta ushqesh,

nga kokëfortësia ndizet zënka.

Sa forca e njeriut është zemërimit i tij,

sa e ka pasurinë aq i rritet zemërimi.

11Zënka e beftë ndizet flakë,

rragatja e beftë derdh gjak.

12Po t'i frysh prushit, merr flakë,

po ta pështysh, shuhet,

e, pra, të dyja nga goja të dalin.

13Mallkuar shpifësi e shtinjaku,

se shumëve ua prishin paqen.

14Gjuha e gjatë ka shkundur shumë vetë,

i ka shpërndarë nga kombi në komb,

ka rrënuar qytete të rrethuara,

ka shembur shtëpitë e të mëdhenjve.

15Gjuha e gjatë ka dëbuar gra burrnesha

e ua ka rrëmbyer mundin.

16Kush e dëgjon, nuk gjen prehje

e nuk jeton në qetësi.

17Një goditje me fshikull lë varrë,

por goditja me gjuhë thyen kockat.

18Shumë kanë rënë nga tehu i shpatës,

por jo aq sa kanë ranë nga gjuha.

19Lum ai që është i mbrojtur prej saj,

që zemërimi i saj s'e ka zënë,

që s'ia ka mbartur zgjedhën

e në vargonjtë e saj s'ka rënë.

20Zgjedha e saj është zgjedhë hekuri

e vargonjtë e saj vargonj bronzi,

21vdekje e ligë vdekja e saj,

edhe skëterra është më e mirë.

22Ajo nuk i sundon besimtarët,

nuk digjen në flakën e saj.

23Ata që lënë Zotin, bien në të,

tek ata ndizet e nuk shuhet,

mbi ta lëshohet si luani,

i shqyen si leopardi.

24Siç e rrethon pronën me ferra,

siç ngjesh argjendin e arin,

25vëri edhe fjalët nën zgjedhë e mbi peshore,

gojës vëri derë e shul.

26Ruaj se të rrëshqet gjuha,

që të mos biesh në pritë.