Siraku 32 - Interconfessional Albanian Bible – 2020 (with DC)（AL1）

Rregullat e tryezës

1Të kanë ulur në krye të vendit? Mos u krekos,

por rri me ta si njëri prej tyre,

kujdesu për ta e pastaj ulu.

2Ulu kur t'i kryesh tërë detyrat,

që të gëzosh me ta

e të marrësh si mirënjohje kurorën e mirësjelljes.

3Fol, o më i moshuar, se të takon,

me dije të përpiktë e jo për të ndalur muzikën.

4Gjatë argëtimit mos e zbraz ligjëratën,

mos e shfaq urtinë në kohën e gabuar.

5Vulë rubini në një stoli ari,

ndërthurja e melodive në një gosti vere.

6Vulë smeraldi në një punim ari,

vija muzikore me verë të dashur.

7Fol, o djalosh, nëse të duhet,

veç dy herë, nëse të pyesin.

8Bjeri shkurt, se kush flet pak, thotë shumë,

bëhu si ai që di, por hesht.

9Mos u barazo me njerëzit e mëdhenj,

kur tjetri flet, mos dërdëllit shumë.

10Bubullimës i prin vetëtima,

edhe të përkorit i prin përkrahja.

11Zgjohu në kohë e mos u plogështo,

kthehu në shtëpi e mos u habit.

12Aty argëtohu e bëj ç'të duash,

por mos mëkato me fjalë.

13Mbi gjithçka, beko krijuesin tënd,

që të ngin me të mirat e veta.

Kujdesi i Zotit

14Kush druan Zotin, ia pranon qortimin,

kush e kërkon qëmenatë, gjen përkrahje.

15Kush shqyrton ligjin, ngihet me të,

por shtiracakët pengohen mbi të.

16Ata që druajnë Zotin e gjejnë gjykimin,

drejtësitë e tyre ndriçojnë si drita.

17Mëkatari i shmanget qortimit

dhe e gjen arsyen sipas dëshirës.

18Burri i mençur nuk e shpërfill mendimin,

i huaji e mendjemadhi nuk përfillin frikën.

19Mos bëj gjë pa u këshilluar,

se nuk pendohesh për çfarë bën.

20Mos shko udhës me pengesa,

se ndesh në gurë.

21Mos i zër besë udhës së lehtë

22e ruhu edhe prej bijve të tu.

23Beso te vetja për çdo vepër,

se kështu mban urdhërimet.

24Kush i beson ligjit, i mban urdhërimet,

kush i zë besë Zotit, nuk poshtërohet.