Siraku 9 - Interconfessional Albanian Bible – 2020 (with DC)（AL1）

Gratë

1Mos u bëj xheloz për gruan që mban në kraharor,

që të mos e mësosh keq kundër teje.

2Mos iu jep gruas me gjithë shpirt,

që të mos sundojë mbi ty.

3Rriji larg gruas së përdalë,

që të mos biesh në kurthet e saj.

4Mos dil me këngëtare,

që të mos biesh pre e dredhive të saj.

5Mos ia ngul sytë vashëzës,

që të mos i pësosh ti ndëshkimet e saj.

6Mos u lësho pas lavireve,

që të mos humbasësh trashëgiminë.

7Mos u end udhëve të qytetit,

mos humb skutave të tij.

8Hiqi sytë nga gruaja shtatderdhur,

mos i vështro hiret e gruas së tjetërkujt.

Shumë janë gënjyer nga bukuria e gruas,

sepse si zjarri e ndez dëshirën.

9Mos u shoqëro me gruan e martuar,

mos pi verë me të,

se drejt saj do të të priret zemra

dhe shpirtin do ta zhytësh në rrënim.

Miqësitë

10Mos e braktis mikun e vjetër,

se miku i ri nuk është si ai.

Miku i ri është si vera e re,

kur vjetrohet, e pi me kënaqësi.

11Mëkatarit mos ia ki zili lavdinë,

ti nuk e di si do t'i vijë rrënimi.

12Mos u kënaq me kënaqësinë e të pafeve,

kujtohu se do të ndëshkohen pa shkuar në skëterrë.

13Rriji larg atij që ka pushtetin të vrasë,

që të mos të zërë frika e vdekjes.

Po i qëndrove pranë, mos u gënje

që të mos të marrë jetën.

Dije se po kalon mes kurthesh,

po ecën majë mureve të qytetit.

14Sa të mundesh, njihi fqinjët e tu,

me të urtët këshillohu.

15Fol me njerëz të mençur,

çdo bisedë e jotja, sipas ligjit të të Tejlartit.

16Ha me njerëzit e drejtë,

krenohu me drojën e Zotit.

17Vepra lëvdohet falë zotësisë së mjeshtrit,

urtia e prijësit falë fjalëve të tij.

18Fjalamanit i trembet mbarë qyteti,

gojëzgjidhurin do ta urrejnë.