Siraku 4 - Interconfessional Albanian Bible – 2020 (with DC)（AL1）

Mëshira për skamnorin

1Bir, të varfrit mos ia moho jetesën,

mos i shpërfill sytë e nevojtarit.

2Shpirtin e të uriturit mos e trishto,

mos e zemëro njeriun e pikëlluar.

3Zemrën e mëritur mos e trazo,

mos ia vono dhuratën nevojtarit.

4Lypësin e mjerë mos e përbuz,

mos ia kthe kurrizin të varfrit.

5Mos ia hiq sytë nevojtarit,

mos i jep shkak askujt të të mallkojë.

6Në të mallkoftë me shpirt të hidhëruar,

krijuesi ia dëgjon përgjërimin.

7Bëhu i dashur në bashkësi,

ul kokën para burrave të mëdhenj.

8Vëri vesh të varfrit,

përgjigjju paqësisht e me butësi.

9Shpëtoje të shtypurin nga dora e të padrejtit,

mos u mpak kur të gjykosh.

10Bëhu si atë për jetimët,

në vend të burrit për nënat e tyre.

Atëherë do të jesh si bir i të Tejlartit,

ka për të të dashur më shumë se nëna jote.

11Urtia i larton bijtë e saj,

kujdeset për ata që e kërkojnë.

12Kush dashuron urtinë, dashuron jetën,

kush e kërkon që në mëngjes, mbushet me gëzim.

13Kush e zotëron, trashëgon lavdinë,

Zoti do ta bekojë kudo që të shkojë.

14Kush e adhuron urtinë, i shërben të Shenjtit,

ata që e dashurojnë do të dashurohen prej Zotit.

15Kush i bindet urtisë do të gjykojë kombet,

kush i përkushtohet do të jetojë i qetë.

16Kush i zë besë do ta trashëgojë,

edhe pasardhësit e tij do ta zotërojnë.

17Do ta shoqërojë udhëve të vështira në fillim,

do t'i shkaktojë tmerr e frikë,

me qortime ka për ta munduar,

derisa të ketë besim tek ai

e të jetë sprovuar nga gjykimet e saj.

18Do të vijë sërish tek ai e do ta gëzojë,

do t'i zbulojë të fshehtat e saj.

19Të mashtruarin e braktis,

ia lë në dorë rrënimit.

20Kap kohën e volitshme, ruaju prej të ligut,

mos të të vijë turp nga vetja.

21Një turp të shpie në mëkat,

një turp të sjell lavdi e hir.

22Mos mbaj anë në dëm të vetes,

që të mos biesh e të turpërohesh.

23Mos e kurse fjalën në rast nevoje,

[mos e fshih urtinë për t'u dukur.]

24Urtia njihet nga fjala,

dituria nga gjërat që thua.

25Mos e kundërshto të vërtetën,

turpërohu me padijen tënde.

26Rrëfeji pa turp mëkatet,

mos u rrek ta ndalësh lumin.

27Mos iu nënshtro njeriut të marrë,

mos ia mbaj anën e sundimtarit.

28Lufto për të vërtetën deri në vdekje

dhe Zoti Perëndi do të luftojë për ty.

29Mos u ngut në fjalët e tua,

mos ji i ngathët e i plogësht në punët e tua.

30Mos u sill si luan në shtëpi,

mos ji dyshues me shërbëtorët e tu.

31Mos e mbaj dorën shtrirë për të marrë

e mos e mbyll për të dhënë.