1Mos u mbështet te pasuria,
as mos thuaj: «Më mjafton».
2Mos ndiq afshet dhe forcën,
mos shko pas dëshirave të zemrës.
3Mos thuaj: «Kush më sundon dot?»,
se Perëndia do të të ndëshkojë.
4Mos thuaj: «Mëkatova, e çfarë do të më gjejë?»,
se Zoti është i ngadaltë në zemërim.
5Mos pandeh se do të falesh
e shton mëkat mbi mëkat.
6Mos thuaj: «Mëshira e tij është e madhe
dhe morinë e mëkateve do të ma falë»,
se ai ka mëshirë, por edhe zemërim.
Mbi mëkatarët bie zemërimi i tij.
7Mos u vono të kthehesh te Zoti
e mos e shty ditë pas dite.
Zemërimi i Zotit shpërthen befas
dhe rrënohesh në kohën e ndëshkimit.
8Mos u mbështet te pasuria e padrejtë,
s'të sjell dobi në ditë të vështirë.
9Mos u lëkund prej çfarëdo ere,
mos ec në çdo shteg,
se kështu është mëkatari gënjeshtar.
10Ji i palëkundur në mendimin tënd
e fjala jote të jetë një.
11Dëgjo shpejt,
përgjigju me durim.
12Nëse di, përgjigjju të afërtit,
në mos, mbaj gojën.
13Nderimi e çnderimi vijnë prej fjalës,
gjuha e rrëzon njeriun.
14Mos të të quajnë shpifës,
mos ngri kurthe me gjuhën tënde,
se vjedhësit i takon turpi
dhe mashtruesit ndëshkimi i rreptë.
15Mos gabo as shumë, as pak,
mos bëj armiq, por miq,
sepse emri i keq trashëgon çnderim e turp,
sikurse mëkatari gënjeshtar.
Who We AreWhat We EelieveWhat We Do
2025 by iamachristian.org,Inc All rights reserved.
