Siraku 44 - Interconfessional Albanian Bible – 2020 (with DC)（AL1）

Lavdia e etërve

1Le t'u këndojmë burrave të lavdishëm,

paraardhësve tanë ndër shekuj.

2Lavdi të madhe u dha Zoti,

madhështinë e vet që prej amshimi.

3Mbretëruan në mbretëritë e veta,

bënë bujë me fuqinë e tyre,

dhanë këshilla me mençuri,

kumtuan me profeci.

4Udhëheqës të popullit me këshilla,

kuptonin doket e popullit,

të zotët e fjalës në mësimet e tyre.

5Shkruan pjesë muzikore,

lanë me shkrim vargje.

6Burra të pasur të pajisur me fuqi,

paqësorë në shtëpitë e tyre.

7Të gjithë ishin të lavdishëm ndër brezni,

krenaria e kohës së vet.

8Disa kanë lënë emër,

që t'u thureshin lavde.

9Disa nuk kujtohen,

janë zhdukur si të mos kishin qenë.

U bënë si të mos kishin lindur,

ata e fëmijët pas tyre.

10Por ata paskan qenë burra të mëshirshëm,

drejtësia e tyre nuk harrohet.

11Ata mbeten te fara e tyre,

trashëgimi e mirë pasardhësit e tyre.

12Pasardhësit e tyre i qëndrojnë besëlidhjes,

falë tyre, edhe të bijtë.

13Fara e tyre mbetet në amshim,

kurrë nuk shuhet lavdia e tyre.

14Trupat e tyre janë varrosur në paqe,

emri i tyre jeton ndër brezni.

15Edhe popujt do ta tregojnë urtinë e tyre,

bashkësia do t'u shpallë lavdinë.

16Enoku i pëlqeu Zotit e u mor,

shembull pendimi për breznitë.

17Noeu u gjet i përsosur e i drejtë,

në kohën e zemërimit u bë përtëritje,

prandaj u la një tepricë në tokë,

kur erdhi përmbytja.

18Besëlidhje të amshuara u bënë me të,

që përmbytja të mos zhbinte asnjë gjallesë.

19Abrahami qe ati i madh i shumë kombeve,

nuk i është gjetur një i ngjashën në lavdi.

20Ai e ruajti ligjin e të Tejlartit,

bëri besëlidhje me të,

E vuri besëlidhjen në mish,

u sprovua e u gjet besnik.

21Prandaj Zoti i bëri betim të sigurt,

se, përmes farës së tij, kombet do të bekoheshin,

se do ta shumonte si pluhurin e dheut,

e farën do t'ia ngrinte në qiell,

se do t'ia jepte trashëgiminë nga deti në det,

nga lumi në skajet e dheut.

22Njësoj bëri edhe me Isakun,

për hir të atit të tij, Abrahamit.

23Bekimin e të gjithë njerëzve dhe besëlidhjen

e zbriti mbi kryet e Jakobit,

ia njohu bekimet

e i dha trashëgiminë,

ia ndau hiset

për t'ua shpërndarë dymbëdhjetë fiseve.