Siraku 36 - Interconfessional Albanian Bible – 2020 (with DC)（AL1）

Lutje për popullin

1Ki mëshirë për ne, o sundues,

Perëndi i gjithësisë, e na shiko,

futu frikën të gjitha kombeve.

2Ngrije dorën kundër kombeve të huaja,

që ta shohin fuqinë tënde.

3Siç u tregove i shenjtë para tyre përmes nesh,

tregohu i madhërishëm para nesh përmes tyre.

4Atëherë do të të njohin siç të njohëm ne,

se s'ka Perëndi përveç teje, o Zot.

5Përtëriji shenjat e përsëriti mrekullitë,

jepi lavdi dorës e krahut tënd të djathtë.

6Zgjoje zemërimin e derdhe furinë,

zhbije kundërshtarin e shfarose armikun.

7Shpejtoje kohën e kujtoje betimin,

që të tregohen madhështitë e tua.

8Në zjarrin e zemërimit u përpiftë i mbijetuari,

i zëntë rrënimi ata që dëmtojnë popullin tënd.

9Shtypua kokat princave armiq

që thonë: «S'ka tjetër veç nesh!».

10Mblidhi mbarë fiset e Jakobit

e ndajua trashëgiminë si në fillim.

11Ki mëshirë, o Zot, për popullin që mban emrin tënd,

për Izraelin, që e caktove të parëlindur.

12Përdëlleje qytetin e shenjtërores sate,

Jerusalemin, vendpushimin tënd.

13Mbushe Sionin me himne për ty

e tempullin me lavdinë tënde.

14Dëshmo për ata që krijove në fillim,

kryeji profecitë që janë bërë në emrin tënd.

15Jepu shpërblimin atyre që të presin,

që profetët e tu të bëhen të besueshëm.

16Dëgjoje, o Zot, lutjen e përgjëruesve të tu,

siç thotë bekimi i Aronit për popullin tënd.

17Ta marrin vesh të gjithë përmbi dhe

se ti je Zot, o Perëndi i amshuar.

Dallimi

18Barku përpin çdo ushqim,

por ndonjë ushqim është më i mirë se tjetri.

19Qiellza e dallon ushqimin e gjahut,

edhe zemra e mençur fjalët e rreme.

20Mendja e mbrapshtë shkakton trishtim,

por njeriu me përvojë ia kthen.

21Gruaja duhet të pranojë këdo për burrë,

por ndonjë vajzë është më e mirë se tjetra.

22Bukuria e gruas të çel fytyrën,

tërë dëshirat e njeriut i tejkalon.

23Nëse flet me mëshirë e përulësi,

burri i saj nuk është si gjithë njerëzia.

24Kush merr grua, zotëron një pronë,

një ndihmë si veten e një shtyllë për t'u mbështetur.

25Ku nuk ka gardh, grabitet prona,

ku nuk ka grua, burri endet e rënkon.

26Kush i zë besë cubit të stërvitur

që bredh qytet më qytet?

27Njësoj është njeriu që nuk ka fole

e bun ku e zë muzgu.