Siraku 27 - Interconfessional Albanian Bible – 2020 (with DC)（AL1）

Rregulla për jetën shoqërore

1Shumë vetë mëkatojnë për hir të fitimit

dhe kush kërkon të pasurohet mbyll një sy.

2Siç futet kunji mes gurëve të ngjeshur,

futet mëkati mes shitjes e blerjes.

3Nëse dikush nuk e druan Zotin sa të mundet,

i merr fund shtëpia.

4Po të tundësh shportën, dalin fundërrinat,

edhe njeriut i dalin mbeturinat kur flet.

5Enën e poçarit e sprovon zjarri,

edhe njeriu sprovohet kur flet.

6Mirëmbajtjen e pemës e tregojnë frytet,

mendimet e zemrës së njeriut, fjala.

7Mos lëvdo askënd para se të flasë,

se kështu sprovohen njerëzit.

8Po ta ndjekësh të drejtën, e arrin,

dhe e vesh si petk lavdie.

9Zogjtë bujnë te të ngjashmit e vet,

edhe e vërteta kthehet tek ata që e zbatojnë.

10Luani pret prenë,

edhe ata që bëjnë padrejtësi.

11Të folurit e besimtarit është përherë urti,

por i çmenduri ndërron si hëna.

12Shkurtoje kohën mes të marrëve,

por rri ngeshëm mes të mençurve.

13E folura e të marrëve është fyese,

e qeshura e tyre zdërhallje mëkatare.

14Thëniet e bemadhit ngrenë qimet përpjetë,

rragatjet e tij shtupë për veshët.

15Rragatjet e mujsharëve përfundojnë në gjakderdhje,

sharjet e tyre të rënda për t'u dëgjuar.

16Kush zbulon të fshehtat humbet mirëbesimin

e nuk gjen mik për shpirt.

17Duaje mikun dhe rriji besnik,

por nëse ia nxjerr të fshehtat, mos e ndiq,

18se, siç humbet dikush njeriun që vdes,

ashtu humb edhe miqësinë me të afërtin.

19Siç lëshon një zog nga dora,

lëshon të afërtin e s'e zë më.

20Mos e ndiq, se është larg,

ka ikur si sorkadhja nga kurthi.

21Plaga mund të lidhet

e sharja ndreqet,

por nxjerrja e të fshehtave është e pashpresë.

22Kush shkel syrin bën gati dëmin,

kush e njeh, i rri larg.

23Para teje është gojëmbël

dhe fjala jote e mahnit,

por më vonë dredhon fjalën

e të zë me fjalët e tua.

24Shumë kam urryer, por jo si atë,

atë e urren edhe Zoti.

25Kush e hedh gurin lart, e hedh mbi kokë të vet,

lëndimi tinëzar hap plagë.

26Kush hap gropën, bie brenda,

kush ngre kurth, zihet vetë.

27Kush bën keq, i kthehet kundër,

pa e marrë vesh nga i vjen.

28Tallja dhe sharja vijnë nga mendjemadhi,

por hakmarrja si luani u zë pritë.

29Kush kënaqet me rrëzimin e besimtarëve, zihet në kurth,

vuajtja i bren para se të vdesin.

30Edhe furia e zemërimi janë të neveritshme,

por mëkatari kapet pas tyre.