Siraku 3 - Interconfessional Albanian Bible – 2020 (with DC)（AL1）

Detyrat ndaj prindërve

1Dëgjomëni mua, atin tuaj, o bij,

kështu veproni, që të shpëtoni.

2Zoti nderon atin më shumë se fëmijët,

cakton të drejtat e nënës mbi bijtë.

3Kush e nderon të atin,

pastrohet nga mëkatet.

4Kush e nderon nënën,

është si të mbledhë thesare.

5Atë që nderon të atin, e gëzojnë të bijtë,

atij i dëgjohet lutja fill.

6Atij që lavdëron të atin, i zgjatet jeta,

kush dëgjon Zotin e paqëson të ëmën,

7u shërben prindërve si të zotërve.

8Me vepra e fjalë nderoje atin,

që prej tij të të vijë bekimi.

9Bekimi i atit e forcon shtëpinë e fëmijëve,

mallkimi i nënës ia shkul themelet.

10Mos u mburr me çnderimin e atin tënd,

se çnderimi i atit nuk është nder.

11Nderimi i atit i jep nder njeriut,

është turp për fëmijët ta përbuzin nënën.

12O bir, ndihmoje atin në pleqëri,

sa është gjallë mos e hidhëro.

13Po ta humbë arsyen, ki dhembshuri,

mos e përbuz në kulmin e fuqisë sate.

14Mirësia ndaj atit nuk harrohet,

në këmbim të mëkateve vlerësohet.

15Do të kujtohet për ty në ditën e pikëllimit,

si bryma në të ngrohtë do të shkrijnë mëkatet e tua.

16Kush braktis të atin është si ai që fyen Zotin,

kush zemëron të ëmën është i mallkuar nga Zoti.

17Bir, kryeji veprat e tua me butësi,

dhe të dashurit e Zotit do të të duan.

18Sa më i madh të jesh, aq më shumë përulu,

që të gjesh hir para Zotit.

19[Të shumtë janë të lartët dhe të lavdishmit,

por i buti do t'ua zbulojë të fshehtat.]

20E madhe është fuqia e Zotit,

të përulurit do ta përlëvdojnë.

21Mos kërko të vështirën,

mos heto përtej fuqive.

22Mendo për çka të është urdhëruar,

të fshehtat nuk janë puna jote.

23Mos u mundo me çka nuk ia del dot,

se të është shfaqur më shumë nga sa kupton njeriu.

24Shumë u mashtruan nga paragjykimet,

në hamendësime të liga u shkau mendja.

25[Pa beben e syrit, nuk e sheh dritën,

kur nuk ke dije, mos bëj sikur di.]

26Zemra e ngurtë në fund do të vuajë,

kush dashuron rrezikun, prej tij do të zhbihet.

27Zemra e ngurtë rëndohet me dhimbje,

mëkatari shton mëkat mbi mëkat.

28Vuajtja e mendjemadhit nuk ka shërim,

në të ka zënë rrënjë bima e ligësisë.

29Zemra e të mençurit e kupton shëmbëlltyrën,

i urti e dëshiron një vesh të vëmendshëm.

30Uji e shuan zjarrin e fuqishëm,

lëmosha i pastron mëkatet.

31Kush e kthen të mirën, mendon për të ardhmen,

kur të rrëzohet do të gjejë mbështetje.