Siraku 14 - Interconfessional Albanian Bible – 2020 (with DC)（AL1）

Rreziku i pasurisë

1Lum njeriu që nuk gaboi me gojë

e nuk e bren brenga e mëkateve.

2Lum ai që nuk e padit ndërgjegjja

e nuk heq dorë nga shpresa.

3Mendjengushtit nuk i bën mirë kamja.

Ç'i duhen pasuritë lakmitarit?

4Kush grumbullon duke i hequr vetes,

grumbullon për të tjerët,

me të mirat e tij zdërhallen të tjerët.

5Kush është e keqja e vetes,

e mira e kujt mund të jetë?

As pasuritë e veta nuk mund t'i gëzojë.

6S'ka më keq se ai që lakmon veten.

Ky është ndëshkimi për ligësinë e vet.

7Edhe po të bëjë mirë, e bën gabimisht,

por në fund e nxjerr ligësinë.

8Kush lakmon me sy është i lig,

kthen kokën dhe përçmon njerëzinë.

9Syri i lakmitarit nuk ngihet me hisen e vet,

ia zhurit shpirtin padrejtësia e ligë.

10Sykeqi vërsulet mbi bukë

e prapë i mungon në tryezë.

11Bir, po munde, merre veten me të mirë,

kushtoji Zotit dhurata të denja.

12Kujtohu se vdekja nuk vonon

dhe vendimi i skëterrës nuk të është zbuluar.

13Bëja të mirën mikut para se të sosesh,

shtrija dorën e jepi sa të mundesh.

14Mos e lër veten pa një ditë të mirë,

mos lër të të ikë hisja e kënaqësisë.

15A nuk do t'ia lësh mundin tjetërkujt?

A nuk do të ndahet me short fryti i mundit tënd?

16Jep e merr e ngazëlleje shpirtin,

se zdërhallja nuk lypet në skëterrë.

17Gjithkush vjetrohet si petku,

se ka një vendim prej amshimit: «Do të vdesësh!».

18Si gjethet e dendura në një pemë të harlisur,

që disa bien e të tjera bulojnë,

kështu janë breznitë prej mishi e gjaku,

soset njëra e tjetra lind.

19Çdo vepër fishket e ikën

dhe, pas saj, kalon edhe ai që e bëri.

20Lum njeriu që përsiat urtinë

e arsyeton me mend.

21I shqyrton udhët e saj në zemrën e vet

e përsiat të fshehtat e saj;

22e ndjek porsi gjuetar,

zë pritë udhës së saj;

23përgjon nga dritaret e saj,

vë veshin te dyert e saj;

24ngulet pranë shtëpisë së saj,

lidh tendën te muret e saj;

25ngul tendën pranë saj

e banon në banesën e mbarësive;

26i vë fëmijët nën strehën e saj,

pushon nën degët e saj;

27mrizon poshtë saj në zheg

e banon në lavdinë e saj.